რომის პაპმა ფრანცისკემ აღიარა, რომ ლოცვის დროს ხანდახან ეძინება. ამის შესახებ მან TV2000-თან საუბრისას განაცხადა, რომელიც მოგვიანებით YouTube-ის არხზე აიტვირთა:

"როდესაც ვლოცულობ, ხანდახან მეძინება. წმინდა ტერეზასაც ასე ემართებოდა ხოლმე".

მისივე თქმით, ლოცვის დროს ჩაძინებისას თავს ისე გრძობს, როგორც ბავშვი ღმერთის ხელებში.

BBC-ს ცნობით, 80 წლის პაპი, როგორც წესი, ადგილობრივი დროით 21 საათზე იძინებს და დილის 4 საათზე იღვიძებს.

რომის 266-ე პაპი ფრანცისკე 2013 წლის 13 მარტიდან წარმოადგენს კათოლიკური ეკლესიისა და ვატიკანის სუვერენული სახელმწიფოს მეთაურს. პაპად არჩევამდე, ის იყო კათოლიკური ეკლესიის არგენტინელი კარდინალი.