რუსეთის სოფლის მეურნეობის სამინისტრომ სომხეთიდან სოფლის მეურნეობის პროდუქციის იმპორტზე დაწესებული შეზღუდვების მოხსნის პირობები წარადგინა. ინფორმაციას სომხური მედია ავრცელებს.

"სოფლის მეურნეობის პროდუქციის უსაფრთხოების უზრუნველყოფა — მათ შორის სომხური მწარმოებლების მიერ ადგილობრივი ნედლეულის გამოყენება, პესტიციდების კონტროლი, მიწოდების ჯაჭვის მიკვლევადობა და სხვა სავალდებულო მოთხოვნები — წარმოადგენს მთავარ პირობას იმ საქონლის იმპორტის განახლებისთვის, რომელზეც ამჟამად შეზღუდვები მოქმედებს", — იუწყება სააგენტო Armenpress, Interfax-ზე დაყრდნობით.

რუსეთის სოფლის მეურნეობის სამინისტრომ აღნიშნული განცხადება უწყების ხელმძღვანელის, ოქსანა ლუტისა და სომხეთის ეკონომიკის მინისტრის, გევორგ პაპოიანის შეხვედრის შემდეგ გაავრცელა, რომელიც ალმათიში, ევრაზიული ეკონომიკური კავშირის (EAEU) აგროინდუსტრიული პოლიტიკის საბჭოს მე-7 სხდომის ფარგლებში გაიმართა.

ლუტმა აბსოლუტურ პრიორიტეტად დაასახელა რუსეთში მიწოდებული საქონლის შესაბამისობა ევრაზიული ეკონომიკური კავშირის ვეტერინარულ და ფიტოსანიტარიულ სტანდარტებთან.