თბილისში პოლიციამ ბინის გაქურდვის ფაქტზე ბრალდებულის სახით კაცი დააკავა, რომელიც წარსულშიც ნასამართლევია და ამჟამადაც პირობითი მსჯავრის ქვეშ იმყოფებოდა.

საქმის მასალების მიხედვით, დაკავებული თბილისში მდებარე ერთ-ერთ საცხოვრებელ სახლში შევიდა, ძვირადღირებული ტექნიკა მოიპარა და შემთხვევის ადგილიდან მიიმალა. პოლიციამ მოპარული ნივთები ნივთმტკიცებად ამოიღო, ხოლო სავარაუდო დამნაშავე დაკავებულია — მას 7 წლამდე ვადით თავისუფლების აღკვეთა ემუქრება.

"შინაგან საქმეთა სამინისტროს თბილისის პოლიციის დეპარტამენტის ვაკე-საბურთალოს მთავარი სამმართველოს თანამშრომლებმა, ქურდობის ბრალდებით, წარსულში ნასამართლევი და ამჟამად პირობითი მსჯავრის ქვეშ მყოფი პირი დააკავეს.

გამოძიებით დადგინდა, რომ ბრალდებულმა, თბილისში მდებარე ერთ-ერთ საცხოვრებელ ბინაში უკანონოდ შეაღწია და მართლსაწინააღმდეგოდ დაეუფლა ძვირადღირებულ ტექნიკას, რის შემდეგაც ადგილიდან მიიმალა.

ჩატარებული ოპერატიული ღონისძიებებისა და საგამოძიებო მოქმედებების შედეგად, სამართალდამცველებმა დანაშაულის ჩამდენი პირი ბრალდებულის სახით დააკავეს.

პოლიციამ ნაქურდალი ნივთები ნივთმტკიცების სახით ამოიღო.

გამოძიება სისხლის სამართლის კოდექსის 177-ე მუხლით მიმდინარეობს, რაც 7 წლამდე ვადით თავისუფლების აღკვეთას ითვალისწინებს", — აღნიშნულია უწყების განცხადებაში.