MMA-ს მებრძოლმა, გიორგი ქართველიშვილმა, თანამოაზრეებთან ერთად ახალი სახალხო მოძრაობა — "ეროვნული თაობა", ოფიციალურად დააფუძნა. სამთავრობო პროპაგანდისტული ტელეკომპანია "რუსთავი 2"-ის ცნობით, საინიციატივო ჯგუფმა განაცხადი იუსტიციის სახლში ცოტა ხნის წინ შეიტანა.

მოძრაობის დამფუძნებელი გიორგი ქართველიშვილი ამბობს, რომ მათი ორგანიზაცია არანაირად არ ემხრობა ძალადობას, სურთ, რომ "ღირებულებები და ეკლესია დაიცვან" და "იდენტობა და საზოგადო მოღვაწეები ქილიკით არავინ მოიხსენიოს".

"ჩვენი ორგანიზაცია არ ემხრობა ძალადობას არანაირად, პირიქით — გვინდა ჩვენ, რომ ჩვენი იდენტობა, ჩვენი ღირებულებები, ჩვენი ეკლესია დავიცვათ მაქსიმალურად და ამ ადამიანებს არ მივცეთ იმის საბაბი და არ იყვნენ ეს ადამიანები იმით მოტივირებულები, რომ ჩვენი იდენტობა, ჩვენი წევრები და საზოგადო მოღვაწეები ესე ქილიკით მოიხსენიონ და პასუხი არ გაეცეთ. არა იმ ფორმებში, რა ფორმებსაც თვითონ უსვამენ ხაზს", — ამბობს "რუსთავი 2"-თან საუბრისას გიორგი ქართველიშვილი.

მისივე თქმით, მისი, მისი ოჯახის და განსაკუთრებით მისი ცოლის მიმართ დიდი ბულინგია, ხაზს უსვამენ მის ვიზუალს, თუმცა ამ ყველაფრისთვის მზად იყო.

"განსაკუთრებით ჩემი და ჩემი ოჯახის, განსაკუთრებულად ჩემი მეუღლის მიმართ არის ძალიან დიდი ბულინგი, უფრო მეტიც, ზიზღის თვალით უყურებენ ამ ყველაფერს და ხაზს უსვამენ ჩემს ვიზუალს. ჩემი დიდი სურვილი იქნება, რომ მთლიანი საქართველო სპორტით იყოს დაკავებული და კონკრეტულად შერეული ორთაბრძოლები იქნება თუ ჭიდაობა და ამ ადამიანებს, მომავალ თაობას პირიქით უნდა უბიძგოთ, რომ სპორტში წავიდნენ და ყურიც ექნებათ გატეხილი და ცხვირიც ექნებათ გატეხილი, ნორმალური და ჯანსაღი თაობა უნდა გაიზარდოს და არა [ისეთი], ჩვენს ტრადიციებს და ღირებულებებს შეურაცხყოფას რომ აყენებენ, და... აქედან გამომდინარე, მე ამ ყველაფრისთვის მზად ვიყავი, ყველანაირი ბულინგისთვისაც მზად ვარ და ყველაფრისთვის, მაგრამ უბრალოდ ამაზრზენია ეს ყველაფერი, მეტი არაფერი", — ამბობს ქართველიშვილი.