აქტივისტი და იუმორისტი ონისე ოქრიაშვილი წუხელ სამმა პირმა საკუთარ სახლთან სცემა. დაზიანებებით ოქრიაშვილი კლინიკაში გადაიყვანეს, სადაც საჭირო კვლევები ჩაუტარდა. აქტივისტმა კლინიკა გვიან ღამით დატოვა.

"მთელი დღე გარეთ ვიყავი და მაინცდამაინც შუაღამისას სახლთან ჩამისაფრდნენ და ასე გამისწორდნენ. ეს ახალი ამბავი არ არის. ესეთ რაღაცები ხდებოდა. მინდა სოლიდარობა გამოვუცხადო სხვა კომიკოსებს, რომლებსაც იგივე ჩასაფრება მოუწყო „ქართული ოცნების“ მიერ დაქირავებულმა ტიტუშკებმა. მიშა მშვილდაძის შემთხვევა იყო ესეთი, რაც მახსენდება. შეიძლება ჩემი შემთხვევა ბოლო არ იყოს და კიდევ ვინმეს გაუსწორდნენ ესე, მაგრამ რაც მთავარია, მე ზუსტად ვიცი, რომ ქართული იუმორი, ქართული სთენდაფი, ქართული კინო, ლიტერატურა, თეატრი და ასე შემდეგ – უკომპრომისო იქნება მაგ ბრძოლაში და გავაგრძელებთ ყველაფერს იმას, რასაც აქამდე ვაკეთებდით.

და გელოდებით ჩვენს სთენდაფებზე, რომ ამ ავბედით ყოფიდან ცოტა ყურადღება გადავიტანოთ და ვიცინოთ ერთად", — განაცხადა ონისე ოქრიაშვილმა კლინიკის დატოვების შემდეგ.

თავდასხმას წინ უძღოდა პროპაგანდისტული მედიების კრიტიკა ონისე ოქრიაშვილის მიერ ნოდარ დუმბაძეზე ხუმრობის გამო. მასზე თავდამსხმელი პირი მოგვიანებით დააკავეს

შსს-ს ცნობით, ონისე ოქრიაშვილზე თავდამსხმელი ვაკე-საბურთალოს პოლიციის სამმართველოში გამოცხადდა და დაიკითხა. ფაქტზე გამოძიება საქართველოს სისხლის სამართლის კოდექსის 126-ე მუხლით მიმდინარეობს.

მომხდარს ნოდარ დუმბაძის შვილიშვილი ნოდარ თოფურიძე სოციალურ ქსელში გამოეხმაურა.

"ბაბუაჩემის სახელით ადამიანის ცემა ან პროვოკატორის ნახელავი უნდა იყოს ან იდიოტის. ესაა ჩემი კომენტარი", — დაწერა ნოდარ თოფურიძემ.