ბრედ პიტის ორ შვილს ოფიციალური სახელიდან მამის გვარის ამოღება სურს. კალიფორნიის სასამართლოში შეტანილი დოკუმენტების მიხედვით, 21 წლის ზაჰარამ და 24 წლის მედოქსმა გვარის შეცვლა პირადი მიზეზებით მოითხოვეს.

მედოქსი

ფოტო: Getty Images

ზაჰარა

ფოტო: Getty Image

ზაჰარას სურს, რომ მისი ოფიციალური სახელი Zahara Marley Jolie-Pitt-ის ნაცვლად Zahara Marley Jolie გახდეს. იმავე მოთხოვნით სასამართლოს მედოქსმაც მიმართა. წინააღმდეგობის არარსებობის შემთხვევაში, მედოქსის საქმეზე გადაწყვეტილებას, სავარაუდოდ, სექტემბრის შუა რიცხვებში მიიღებენ, ზაჰარას განაცხადს კი ივლისის ბოლოს განიხილავენ.

შვილების ეს სურვილი ბრედ პიტისა და ანჯელინა ჯოლის ოჯახის გარშემო განვითარებული მოვლენების გაგრძელებაა. მსახიობები 2014 წელს დაქორწინდნენ, თუმცა 2016 წელს ერთმანეთს დაშორდნენ. მათ ექვსი შვილი ჰყავთ — მედოქსი, პაქსი, ზაჰარა, შაილო და ტყუპები — ნოქსი და ვივიენი.

ფოტო: Jun Sato

ანჯელინა ჯოლიმ განქორწინების მოთხოვნით სასამართლოს 2016 წლის სექტემბერში მიმართა, მას შემდეგ, რაც ოჯახი საფრანგეთიდან აშშ-ში კერძო თვითმფრინავით მიემგზავრებოდა. მოგვიანებით გავრცელებული FBI-ის ანგარიშის მიხედვით, ანჯელინა ჯოლი ბრედ პიტს ფრენის დროს მის მიმართ ძალადობასა და შვილებთან სიტყვიერ დაპირისპირებაში ადანაშაულებდა.

2022 წელს სასამართლოში ანჯელინა ჯოლიმ განაცხადა, რომ ინციდენტის დროს ბრედ პიტმა ერთ-ერთ შვილს კისერში ხელი წაუჭირა, მეორეს კი სახეში დაარტყა. პიტის წარმომადგენელმა მაშინ აღნიშნა, რომ მსახიობი მხოლოდ იმ ქმედებებზე იღებდა პასუხისმგებლობას, რომლებიც ჩაიდინა, თუმცა არა იმაზე, რაც, მისი თქმით, არ გაუკეთებია.

ანჯელინა ჯოლი და ბრედ პიტი კანის 62-ე საერთაშორისო კინოფესტივალზე, 2009 წლის 20 მაისი.

ფოტო: WireImage

თავად ანჯელინა ჯოლიმ ოფიციალური სახელიდან პიტის გვარი 2019 წელს ამოიღო, მას შემდეგ, რაც სასამართლომ მათი ქორწინება ოფიციალურად შეწყვეტილად გამოაცხადა.

პიტის გვარზე უარი წყვილის სხვა შვილებმაც თქვეს — ვივიენმა 2024 წელს The Outsiders-ის პროგრამაში მხოლოდ ჯოლის გვარი გამოიყენა, შაილომ კი იმავე წელს გვარის ოფიციალურად შეცვლა მოითხოვა.