კრისტოფერ ნოლანი თავისი ფილმების გადასაღებ მოედანზე მსახიობებს აგების ჩაცმის უფლებას არ აძლევს. ეს წესი რეჟისორმა თავის უახლეს ფილმზე, ოდისეაზე, მუშაობის დროსაც დაიცვა.

ნოლანის თქმით, გადასაღებ მოედანზე აგების გამოჩენა დაახლოებით ისეთივე ეფექტს ახდენს, როგორსაც კადრს მიღმა ჩიფსების ჭამა. მსგავსი დეტალები მსახიობებს რეალურ სამყაროში აბრუნებს და იმ გარემოს აშორებს, რომლის შექმნასაც გადამღები ჯგუფი ცდილობს.

"მინდა, თავადაც იმ მომენტში დავრჩე და მსახიობებმაც იგივე შეძლონ. რაც უნდა აბსურდულად ჟღერდეს, ჩემთვის აგები თანამედროვე სამყაროს სიმბოლოა", — თქვა რეჟისორმა.

ფოტო: Universal Pictures

ფოტო: Universal Pictures

რეჟისორმა აღნიშნა, რომ თავად აგების საწინააღმდეგო არაფერი აქვს. მსახიობები მათ ხშირად იმიტომ იცვამენ, რომ კოსტიუმისთვის შერჩეული ფეხსაცმელი მოუხერხებელი ან მტკივნეულია.

რეჟისორის აგების მიმართ დამოკიდებულება ყურადღების ცენტრში არაერთხელ მოექცა. ენ ჰეთეუეი ნოლანთან ერთად The Dark Knight Rises-სა და ოდისეაზე მუშაობდა. მსახიობის თქმით, ერთხელ გადასაღებ მოედანზე აგებით მივიდა, თუმცა ნოლანმა მის ფეხსაცმელს დახედა და უთხრა, რომ გაეხადა. მას შემდეგ მსახიობს გადაღებებზე აგები აღარ ჩაუცვამს.

მსგავსი გამოცდილება სხვა ცნობილ მსახიობებსაც ჰქონდათ. მეთ დეიმონმა აღნიშნა, რომ ნოლანს აგები "ყველაფერზე მეტად სძულს". რეჟისორის ამ წესს ემილი ბლანტიც კარგად იცნობს, რომელიც მასთან ოპენჰაიმერზე მუშაობდა. ბლანტის თქმით, ერთხელ გადასაღებ მოედანზე აგებით მივიდა. ნოლანმა კი ფეხსაცმელს ისეთი მზერით შეხედა, რომ მსახიობს The Devil Wears Prada-დან მირანდა პრისტლი გაახსენდა.