პოლონეთის უშიშროების ბიუროს ხელმძღვანელმა გიორგი მარგველაშვილთან შეხვედრისას განაცხადა, რომ საქართველოს ნატოსა და ევროკავშირში გაწევრიანება ევროპის უსაფრთხოებაზე დადებითად აისახება. ამის შესახებ ინფორმაციას საქართველოს პრეზიდენტის ადმინისტრაცია ავრცელებს.

პაველ სოლოხმა შეხვედრაზე აღინიშნა, რომ პოლონეთი უპირობოდ მხარს უჭერს საქართველოს ჩრდილოატლანტიკურ ალიანსისაკენ სწრაფვას.

"ვფიქრობ, რომ ალიანსის ისეთი მნიშვნელოვანი პარტნიორი, როგორიც საქართველოა იმსახურებს ნატოს წევრობას და უახლოეს სამიტზე ჩვენ ამ თემას კიდევ ერთხელ წამოვწევთ.

ჩვენ ასევე მხარს ვუჭერთ საქართველოს მისწრაფებას გახდეს ევროკავშირის სრულუფლებიანი წევრი.

დარწმუნებული ვარ, საქართველოსთვის მნიშვნელოვანი ამ ორი მიზნის მიღწევა დადებითად აისახება, როგორც პოლონეთის უსაფრთხოების გარემოს გაუმჯობესებაზე, ასევე, მთლიანად, ევროპის უსაფრთხოების არქიტექტურაზე".

სოლოხმა ხაზი გაუსვა საქართველოსა და პოლონეთს შორის მრავალწლიან მეგობრობას და ერთმანეთის პოლიტიკური მხარდაჭერის მნიშვნელობას:

"ჩვენი ქვეყნების თანამშრომლობა განსაკუთრებით მნიშვნელოვანია თანამედროვე სამყაროს წინაშე არსებული გამოწვევების ფონზე" - განაცხადა სოლოხმა.

გიორგი მარგველაშვილმა და პაველ სოლოხმა შეხვედრაზე რეგიონში შექმნილ უსაფრთხოების გარემოზე, ქვეყნის ევროპულ, ევროატლანტიკურ ინტეგრაციის პროცესის მიმდინარეობაზე, ნატო-ს ვარშავის სამიტისთვის მზადების საკითხებზე და ოკუპირებულ ტერიტორიებზე შექმნილ ვითარებაზე ისაუბრეს.