საქართველოს ფეხბურთის ფედერაციის ვიცე-პრეზიდენტი, ნიკა ჯღარკავა ტელეკომპანია მაესტროს ეთერში ამბობს, რომ პირადად მისთვის ნიდერლანდების გუნდ ვიტესის ქართველი კაპიტანი, გურამ კაშია სამაგალითო პიროვნებაა. მისივე თქმით, ფეხბურთში დაუშვებელია დისკრიმინაცია, ფედერაცია გმობს ძალადობას და მხარს უჭერს გამოხატვის თავისუფლებას.

"ფეხბურთი, პირველ რიგში, ძალიან დიდი სოციალური მოვლენაა, შესაბამისად არ არის გასაკვირი, რომ ფეხბურთის მეშვეობით ხდება საზოგადოებაში მრავალი მნიშვნელოვანი მესიჯის ტრანსფორმირება, გადატანა და ფეხბურთის მეშვეობით ამაზე მსჯელობა. ეს გურამს არ დაუწყია, ეს არ დაწყებულა გუშინ, არც გუშინწინ. დიდი ხანია ასე ხდება და ამაში ცუდი არაფერი არ არის."

ჯღარკავა განმარტავს, რომ UEFA დიდი ხანია აწარმოებს კამპანიას Respect, რომლითაც თანასწორობას, ანტი დისკრიმინაციას უჭერს მხარს და ფეხბურთის მეშვეობით, აღვივებს ამ იდეებს საზოგადოებაში:

"ბოლო მსგავსი კამპანია არის Equal Game, რომლის პრეზენტაციაც ცოტა ხნის წინ მოხდა. იგულისხმება ის, რომ ფეხბურთში დაუშვებელია ნებისმიერი სახის დისკრიმინაცია და ფეხბურთი არის ყველასათვის, მიუხედავად რელიგიისა, რასისა, პოლიტიკური შეხედულებისა და ა.შ."

ნიკა ჯღარკავას თქმით, ნებისმიერი მოთამაშე თავისუფალია თავისი აზრის დაფიქსირებაში. მაესტროს ჟურნალისტის კითხვის პასუხად, ჯღარკავა ხაზს უსვამს, რომ თბილისი ევროპული ქალაქია და ფეხბურთის ფედერაცია მხარს უჭერს დემოკრატიული სახელმწიფოს პრინციპებს.

გურამ კაშია საქართველოს ეროვნული ნაკრების ფეხბურთელი და ნიდერლანდების გუნდ ვიტესის კაპიტანია. ფეისბუკზე მისი ფოტოს გამოჩენას, რომელზეც თამაშის დროს, ლგბტ დროშის ფერებში სამკლაური უკეთია ქართველი მომხმარებლების ნაწილი გაღიზიანება მოჰყვა. მოგვიანებით კაშიამ განაცხადა, რომ ძალადობის წინააღმდეგია და არ ნანობს რაც გააკეთა. თავად სამკლაური კი ცნობიერების ამაღლების კამპანიის ნაწილია.

გაიგეთ მეტი: