22 წლის ნიკო კვარაცხელიას მკვლელობაში ბრალდებულ ძმებს, დავით და გურამ კაკულიებს ფსიქიატრიულ-ფსიქოლოგიური ექსპერტიზა დაენიშნათ — ინფორმაციას "ინტერპრესნიუსი" ავრცელებს.

ბრალდებულ ძმებს ექსპერტიზა ლევან სამხარაულის სახელობის სასამართლო ექსპერტიზის ეროვნულ ბიუროში ჩაუტარდებათ. ხოლო მათი და ძებნაში მყოფი ბუსა ჟვანიას წინასასამართლო სხდომა აგვისტოში ჩატარდება.

ძმებ კაკულიების ადვოკატმა, დავით კუტალაძემ "ინტერპრესნიუს" განუცხადა, რომ ფსიქიატრიული ექსპერტიზა მსგავს დანაშაულებზე სტანდარტული პროცედურაა. ბრალდებულების ადვოკატის შეფასებით, "ბრალი ხელოვნური აჟიოტაჟის შედეგია" და სასამართლოსგან გამამართლებენ განაჩენს ელოდება.

"ეს სტანდარტული პროცედურაა მსგავსი კატეგორიის საქმეებზე, მაშინ, როცა კონკრეტულ ადამიანს ბრალად ედება 109-ე მუხლით გათვალისწინებული დანაშაულის ჩადენა. აღნიშნულში განსაკუთრებული არაფერია და ვფიქრობ, რამე განსხვავებული შედეგის მოლოდინი არც ერთ მხარეს არ გააჩნია, არც ბრალდების და არც დაცვის მხარეს. [...]

უამრავი ობიექტური ფაქტობრივი გარემოება და მტკიცებულება არსებობს იმის დასადასტურებლად, რომ ეს ბრალი ხელოვნური აჟიოტაჟის შედეგია და ალბათ, დაზარალებული მხრიდან წამოწეული კონკრეტული მოთხოვნების დაკმაყოფილებას ემსახურება და არა იმ ობიექტურ მოცემულობას და მტკიცებულებებს, რაც საქმეშია. შესაბამისად, სასამართლოსგან გამამართლებელ განაჩენს ველოდებით," — განაცხადა ადვოკატმა.

ცნობისთვის, 17 თებერვალს ნიკა კვარაცხელიას მკვლელობის საქმეზე გურამ კაკულიას, დავით კაკულიას, ბესარიონ ჟვანიას ბრალი წარედგინა.

ძმებ კაკულიებს ბრალი პენიტენციურ დაწესებულებაში წაუყენეს. მათ სხვა საქმეზე 9-9 წლით პატიმრობა აქვთ მისჯილი. კერძოდ, 2022 წელს, არაყიშვილის ქუჩაზე, კაკულიებმა განზრახ მოკვლის მიზნით ცეცხლსასროლი იარაღიდან რამდენჯერმე გასროლით ერთი პირის დაჭრეს.

რაც შეეხება ბესარიონ (ბუსა) ჟვანიას, რომელიც ექსპრემიერ ზურაბ ჟვანიას შვილია, წარსულშიც ნასამართლევია. 2020 წლის 2 აგვისტოს ჟვანიამ, მის ბიზნეს-პარტნიორს, გოგი თოფაძის შვილიშვილს, ლევან თოფაძეს ცივი იარაღით სიცოცხლისთვის საშიში დაზიანებები მიაყენა. ჟვანიას საპროცესო შეთანხმება გაუფორმდა და 3-წლიანი პატიმრობა შეეფარდა. ამ სამი წლიდან მსჯავრდებულმა 1,5 წელი საპატიმროში მოიხადა, დანარჩენი — პირობითი სასჯელის სახით. ჟვანიაზე საერთაშორისო ძებნაა გამოცხადებული.

2021 წლის 15 სექტემბერს, 22 წლის ნიკო კვარაცხელია საკუთარ საცხოვრებელ სახლთან მოკლეს. თავდამსხმელმა ნიკო კვარაცხელიას ცეცხლსასროლი იარაღით მრავალჯერ ესროლა და შემდეგ ადგილიდან მიიმალა. გამოძიების ვერსიით, 22 წლის ახალგაზრდას მკვლელობაში ბრალდებულები აკო ჭელიძე და გიორგი კავილაძე არიან — მათ სასამართლომ 17 და 16 წლით პატიმრობა მიუსაჯა. კვარაცხელიას ოჯახს დღემდე არ სჯეროდა გამოძიების ამ ვერსიის და ამტკიცებდა, რომ კვარაცხელიას მკვლელობის შემკვეთ პირს სახელმწიფო მფარველობდა.

იზა ომაძე: "მხოლოდ ბრალია წარდგენილი. მე ველოდები, ჩემი ყურით მოვისმინო, რომ ნიკო კვარაცხელიას მკვლელებს სამუდამო პატიმრობა მიესაჯათ"