მოკლული ნიკო კვარაცხელიას დედა იზა ომაძე პროკურატურის განცხადებას ეხმიანება. მისი ტქმით, პროკურატურის გამოძიების ვერსიაში მისთვის ახალი არაფერი ყოფილა და 5 წელი უწყებისგან ამ ზომების მიღებას ითხოვდა.

იზო ომაძეს ამბობს, რომ ის ბრძოლას იქამდე გააგრძელებს, სანამ მისი შვილის მკვლელობაში ბრალდებულებს სასჯელის უმაღლესს ზომას, სამუდამო პატიმრობას არ მიუსჯიან. რაც შეეხება პროკურატურის ვერსიას მკვლელობის მოტივთან დაკავშირებით, მოკლული ახალგაზრდის დედა ტყუილს უწოდებს და ამბობს, რომ უახლოეს მომავალში საქმის დეტალებს გაასაჯაროებს.

"მე მინდა მადლობა გადავუხადო ღმერთს და თითოეულ თანამებრძოლს, რომლებიც ამ 5 წლის განმავლობაში ჩემთან ერთად ინტერესით ელოდნენ ამ მკვლელობის გახსნას. პირველ რიგში მადლობა მინდა გადავუხადო ჟურნალისტებს, რომლებიც მაქსიმალურად ყველაფერს აკეთებდნენ, რომ ეს რეზონანსული მკვლელობა მისულიყო საზოგადოებამდე.

დღეს ვუსმინე პროკურატურის ბრიფინგს — ნიკო კვარაცხელიას საქმე გახსნილად გამოცხადდა. ეს მათი შეფასებაა, მაგრამ აქ წერტილი არ დასმულა. ეს მხოლოდ ერთი რგოლია. ორი დღის წინ ინგა გრიგოლიასთან, "რეაქციაში", ვილაპარაკე, რომ ეს მკვლელობა ყველაზე ბინძური გზით დაიგეგმა. ჩემთვის ახალი არაფერია, უკვე 5 წელია ამას ვითხოვ.

ეს არის ერთ-ერთი რგოლი — ადამიანებმა, რომლებმაც თავად ვერ გაბედეს ასეთ ბოროტებაზე წასვლა, შემსრულებლები მოძებნეს. თუმცა ეს მათთვის საბედისწერო აღმოჩნდა, რადგან ჩვენი საზოგადოება მეტ-ნაკლებად ყურადღებით ადევნებს თვალს სენსაციურ ამბებს. ეს მკვლელობა რომ ძმებს შეესრულებინათ, დამკვეთისთვის, შესაძლოა, უფრო მარტივად "შესაფუთი" ყოფილიყო. მაგრამ ასე არ მოხდა — სრულიად უცხო ადამიანებმა, აკო ჭელიძემ და გიორგი კავილაძემ, რომლებსაც ნიკო არ იცნობდა, ჩემი შვილი ვერაგულად მომიკლეს.

აქ არაფერი მთავრდება, აქ მხოლოდ ბრალია წარდგენილი. მე ველოდები, ჩემი ყურით მოვისმინო, რომ ნიკო კვარაცხელიას მკვლელებს სამუდამო პატიმრობა მიესაჯათ. ჯგუფურად და ერთობლივად დაგეგმილი მკვლელობა სწორედ ამ სასჯელს ითვალისწინებს.

არაფერი მეჩქარება, კი, 5 წელი დასჭირდა. ალბათ, არ იყო პოლიტიკური ნება, თორემ მეორე დღესვე ტაქსის მძღოლმა კონკრეტული სახელები და გვარები დაასახელა. მე მადლობას ვუხდი მათ — მათ ჰქონდათ ინფორმაცია, ტელეფონი და კონკრეტული სახელები და გვარები.

მე მაქვს არგუმენტები და ფაქტები, ვინ შეიძლება ყოფილიყო მფარველი. ყველაფერს მოვყვები — სახელებსა და გვარებსაც დავასახელებ..." — განაცხადა იზა ომაძემ ტვ პირველის ეთერში.

ნიკა კვარაცხელიას მკვლელობის საქმეზე გურამ კაკულიას, დავით კაკულიას, ბესარიონ (ბუსა) ჟვანიას ბრალი წარედგინა, მათ 20 წლამდე ან უვადო პატიმრობა ემუქრებათ.

პროკურატურაში გამართულ ბრიფინგზე ითქვა, რომ ნიკოლოზ კვარაცხელიას შეკვეთით, ჯგუფურად განზრახ მკვლელობის ორგანიზებით სისხლის სამართლის საქმე გახსნილია.

2021 წლის 15 სექტემბერს, 22 წლის ნიკო კვარაცხელია საკუთარ საცხოვრებელ სახლთან მოკლეს. თავდამსხმელმა მას ცეცხლსასროლი იარაღით მრავალჯერ ესროლა და შემდეგ ადგილიდან მიიმალა. გამოძიების ვერსიით, 22 წლის ახალგაზრდას მკვლელობაში ბრალდებულები აკო ჭელიძე და გიორგი კავილაძე არიან — მათ სასამართლომ 17 და 16 წლით პატიმრობა მიუსაჯა. კვარაცხელიას ოჯახი აცხადებდა, რომ მკვლელობის შემკვეთ პირს სახელმწიფო მფარველობდა.