18 სექტემბერს თბილისის საქალაქო სასამართლოში ნიკო კვარაცხელიას მკვლელობის საქმეზე პროცესი გაიმართა. კვარაცხელიას მკვლელობის ორგანიზებაში ბრალდებულ ბესარიონ (ბუსა) ჟვანიას პატიმრობა დაუსწრებლად შეეფარდა.

საქმის პროკურორის, გია შაიშმელაშვილის თქმით, ბუსა ჟვანია გამოძიების ფარგლებში რამდენჯერმეა გამოკითხული და ყოველ ჯერზე განსხვავებულ ჩვენებას იძლეოდა. ჟვანიამ საგამოძიებო ორგანოებს სხვა მობილური ტელეფონი მისცა, რათა ვერ დაედგინათ მისი კავშირი მკვლელობასთან. პროკურორის განმარტებით, ბრალდებული თავს არიდებს სასამართლოში გამოცხადებას და გამოძიებას ხელს უშლიდა.

ბესარიონ (ბუსა) ჟვანია, რომელიც ექსპრემიერ ზურაბ ჟვანიას შვილია, წარსულშიც ნასამართლევია. 2020 წლის 2 აგვისტოს ჟვანიამ მის ბიზნეს-პარტნიორს, გოგი თოფაძის შვილიშვილს, ლევან თოფაძეს ცივი იარაღით სიცოცხლისთვის საშიში დაზიანებები მიაყენა. ჟვანიას საპროცესო შეთანხმება გაუფორმდა და 3-წლიანი პატიმრობა შეეფარდა. ამ სამი წლიდან მსჯავრდადებულმა 1,5 წელი საპატიმროში მოიხადა, დანარჩენი — პირობითი სასჯელის სახით.

პროკურორის განცხადებით, ჟვანიას სასჯელაღსრულების დაწესებულება ახალი დატოვებული ჰქონდა, როდესაც კვარაცხელიას მკვლელობის დაორგანიზება დაიწყო.

ჟვანიას ადვოკატების განცხადებით, ბრალდების მხარეს "დღემდე არ წარმოუდგენია არცერთი ღირებული სამხილი" მათი დაცვის ქვეშ მყოფის წინააღმდეგ და მათი განცხადებით, "საეჭვოდ დაემთხვა" საქმის გახსნა გარკვეული ჯგუფების მოთხოვნას, რომ საპროტესტო აქციების დაიწყებდნენ.

ძმები კაკულიები სასამართლო სხდომაზე მოსვლა არ ისურვეს და დისტანციურად ჩაერთნენ. დავით კაკულიამ პროცესზე სიტყვით ისარგებლა და განაცხადა, რომ მათ წინააღმდეგ წაყენებული ბრალი "მედიის მოგონილი ვერსია" და აბსურდია.

"კატეგორიულად არ ვეთანხმებით ბრალს. ეს არის მედიის მოგონილი ვერსია. ჩვენ არავისთვის დაგვივალებია ნიკა კვარაცხელიას მკვლელობა. ეს არის აბსურდი. დარწმუნებულები ვართ, რომ კვარაცხელიას ოჯახი პროცესებზე გაიგებს ამას და სარჩელს გაიტანს," — თქვა დავით კაკულიამ.

პროკურატურის შუამდგომლობით პატიმრობაში მყოფი კაკულიების წინა სასამართლო პროცესი 8 აპრილს, 15:00 საათზე ჩაინიშნა.

შეგახსენებთ, 2021 წლის 15 სექტემბერს, 22 წლის ნიკო კვარაცხელია საკუთარ საცხოვრებელ სახლთან მოკლეს. თავდამსხმელმა ნიკო კვარაცხელიას ცეცხლსასროლი იარაღით მრავალჯერ ესროლა და შემდეგ ადგილიდან მიიმალა. გამოძიების ვერსიით, 22 წლის ახალგაზრდას მკვლელობაში ბრალდებულები აკო ჭელიძე და გიორგი კავილაძე არიან — მათ სასამართლომ 17 და 16 წლით პატიმრობა მიუსაჯა. კვარაცხელიას ოჯახს დღემდე არ სჯეროდა გამოძიების ამ ვერსიის და ამტკიცებდა, რომ კვარაცხელიას მკვლელობის შემკვეთ პირს სახელმწიფო მფარველობდა.

17 თებერვალს, პროკურატურაში გამართულ ბრიფინგზე ითქვა, რომ ნიკოლოზ კვარაცხელიას შეკვეთით, ჯგუფურად განზრახ მკვლელობის ორგანიზებით სისხლის სამართლის საქმე გახსნილია.

მკვლელობის საქმეზე გურამ კაკულიას, დავით კაკულიას და ბესარიონ (ბუსა) ჟვანიას ბრალი წარედგინა — მათ 20 წლამდე, ან უვადო პატიმრობა ემუქრებათ.