პარტია საქართველოსთვის ადამიანის უფლებათა ევროპული სასამართლოს მიერ 2008 წლის აგვისტოს ომის დროს დატყვევებული ქართველი სამხედროების საქმეებზე მიღებულ გადაწყვეტილებას გამოეხმაურა.

პარტიის განცხადებით, ეს სამართლებრივი ვერდიქტი უმნიშვნელოვანესია ქვეყნის სახელმწიფოებრივი ინტერესებისთვის

"სტრასბურგის სასამართლოს გადაწყვეტილებამ კიდევ ერთხელ დაადასტურა ქართველი ხალხის სიმართლე და რუსეთის ფედერაციის დანაშაული საქართველოს და ქართველების წინააღმდეგ.

2008 წლის აგვისტოს ომის დროს რუსეთის ფედერაცია პასუხისმგებელია ქართველი სამხედრო ტყვეების მკვლელობაზე, წამებასა და ამ უმძიმესი დანაშაულების გამოუძიებლობაზე", — წერია პარტიის მიერ გავრცელებულ განცხადებაში.

გახარიას გუნდი აღნიშნავს, რომ სტრასბურგის მიერ დადგენილი ფაქტები რუსული ოკუპაციის რეალურ სახეს აჩვენებს და მადლობას უხდის ყველას, ვინც ამ საქმეებზე წლების განმავლობაში მუშაობდა, განსაკუთრებით კი საქართველოს ახალგაზრდა იურისტთა ასოციაციას (საია).

"გიორგი ანწუხელიძის, უშანგი სოფრომაძის, კახაბერ ხუბულურის, დავით მალაჩინის, ზაზა კავთიაშვილის, იმედა კუთაშვილის მალხაზ მელაძის, კახაბერ ზირაქაშვილის — ქართველი სამხედროების მიმართ ჩადენილი დანაშაულები რუსეთის აგრესიისა და რუსული ოკუპაციის სასტიკი სახეა, რომელიც დღესაც გრძელდება საქართველოს სუვერენიტეტის და ეროვნული სხეულის წინააღმდეგ.

ეს გადაწყვეტილება მნიშვნელოვანია არა მხოლოდ დაზარალებულებისთვის და მათი ოჯახებისთვის, არამედ საქართველოს სახელმწიფოებრივი ინტერესისთვის, ჩვენი სუვერენიტეტისა და ისტორიული სიმართლის საერთაშორისო სამართლებრივი აღიარებისთვის, თითოეული ქართველისთვის.

ჩვენ მადლობას ვუხდით ყველა იურისტს, ორგანიზაციასა თუ ადამიანს, ვინც წლების განმავლობაში იბრძოდა ამ სიმართლის დასადგენად, განსაკუთრებით საქართველოს ახალგაზრდა იურისტთა ასოციაცია-ს", — აღნიშნულია განცხადებაში.

განცხადების დასასრულს პარტიამ პატივი მიაგო დაღუპული ჯარისკაცების ხსოვნას.

"ქედს ვიხრით გმირების წინაშე, ვინც საქართველოსთვის სიცოცხლე გასწირა. მათი უკვდავი სული მუდამ იქნება ჩვენი ქვეყნის ისტორიაში და ქართველი ხალხის ცნობიერებაში", — წერს გახარია საქართველოსთვის.

შეგახსენებთ, საქართველოს ახალგაზრდა იურისტთა ასოციაციის (საია) ინფორმაციით, ადამიანის უფლებათა ევროპულმა სასამართლომ საქმეებზე — "მალაჩინი და სხვები რუსეთის წინააღმდეგ" და "ჩიკვილაძე და ანწუხელიძე რუსეთის წინააღმდეგ" — რუსეთის ფედერაციას ადამიანის უფლებათა ევროპული კონვენციის მე-2 (სიცოცხლის უფლება) და მე-3 (წამების აკრძალვა) მუხლების დარღვევა დაადგინა.