კომპანია Procter & Gamble-მა, რომელიც ისეთი ცნობილი ბრენდების მფლობელია, როგორებიცაა Gillette, Pampers, Tide და Fairy, სანქცირებულ სამთავრობო ტელეკომპანია "იმედთან" თანამშრომლობა შეწყვიტა. ამის შესახებ ბრიტანული გამოცემა City A.M. წერს.

გამოცემის ინფორმაციით, P&G აგრძელებდა "იმედზე" რეკლამის განთავსებას იმის მიუხედავად, რომ ტელეკომპანია მიმდინარე წლის თებერვალში დიდი ბრიტანეთის სანქციების სიაში მოხვდა. City AM-ის ცნობით, კომპანიის ევროპული ეთიკისა და შესაბამისობის ოფისის უფროსი დირექტორის, ჯონ ბრენდონის მიერ ჩატარებული შიდა გამოძიების შედეგად, Procter & Gamble-მა "იმედთან" საქმიანი ურთიერთობა ორშაბათს შეწყვიტა.

"P&G ყველა ბაზარზე, სადაც მომხმარებლებს ემსახურება, კანონის მოთხოვნებს იცავს და სანქციებთან შესაბამისობის მიმართ მკაცრ მიდგომას იყენებს, მათ შორის მედიის შესყიდვების პრაქტიკაშიც. ჩვენ არ დაგვირღვევია გაერთიანებული სამეფოს სანქციების რეჟიმი. თუმცა, ნებაყოფლობით შევცვალეთ ჩვენი მიდგომა და საქართველოში ტელეკომპანია „იმედზე“ რეკლამის განთავსება შევაჩერეთ," — განუცხადა Procter & Gamble-ის წარმომადგენელმა City AM-ს.

ამავე გამოცემის ცნობით, "იმედთან" თანამშრომლობის საკითხზე შიდა გამოძიება დაიწყო Nestle-მაც. გამოძიებას კომპანიის გლობალური იურიდიული ხელმძღვანელი ლიან ჯილი ხელმძღვანელობს.

City AM აღნიშნავს, რომ სხვა საერთაშორისო კომპანიებმა, მათ შორის BBC-ის კომერციულმა განყოფილებამ, "იმედთან" თანამშრომლობა მას შემდეგ შეწყვიტა, რაც ტელეკომპანია ბრიტანეთის საგარეო უწყების სანქციების სიაში მოხვდა.

გამოცემის ცნობით, 2003 წელს ბიზნესმენ ბადრი პატარკაციშვილის მიერ დაფუძნებული ტელეკომპანია "იმედი" გაერთიანებული სამეფოს ოფიციალურ სანქციების სიაშია შეყვანილი და აღწერილია, როგორც საშუალება, რომელიც რუსეთის უკრაინაში სრულმასშტაბიან შეჭრასთან დაკავშირებით "განზრახ შეცდომაში შემყვან ინფორმაციას" ავრცელებს.

"ტელეკომპანია "იმედი" მხარს უჭერს ან პოპულარიზაციას უწევს ისეთ პოლიტიკასა და ქმედებებს, რომლებიც უკრაინის დესტაბილიზაციას ან მისი ტერიტორიული მთლიანობის, სუვერენიტეტისა და დამოუკიდებლობისთვის საფრთხის შექმნას ემსახურება. კერძოდ, ის რეგულარულად ავრცელებს შინაარსს, რომლის მიხედვითაც უკრაინის მთავრობა და პრეზიდენტი ვოლოდიმირ ზელენსკი არალეგიტიმურად არიან წარმოჩენილნი, უკრაინა "დასავლეთის მარიონეტად" და კორუმპირებულ სახელმწიფოდ არის წარმოდგენილი, ხოლო უკრაინა და დასავლეთი საქართველოს დესტაბილიზაციას ცდილობენ," — აცხადებენ დიდი ბრიტანეთის საგარეო, თანამეგობრობისა და განვითარების ოფისში (FCDO).

City AM ასევე იხსენებს, რომ Procter & Gamble-ს უკრაინაში ომის დაწყების შემდეგ რუსეთის ბაზარზე საქმიანობის გამო არაერთხელ აკრიტიკებდნენ. 2023 წელს უკრაინის კორუფციის პრევენციის ეროვნულმა სააგენტომ კომპანია "ომის საერთაშორისო სპონსორად" დაასახელა, მიუხედავად იმისა, რომ P&G-მ რუსეთში საქმიანობა მნიშვნელოვნად შეამცირა, ახალი ინვესტიციები შეაჩერა და სარეკლამო აქტივობები შეზღუდა.