კომპანია Nestle-მ შიდა გამოძიება მას შემდეგ დაიწყო, რაც საკუთარი პროდუქციის რეკლამა სანქცირებულ ქართულ ტელეარხ "იმედზე" განათავსა. ამის შესახებ გამოცემა City A.M. ავრცელებს.

City A.M. წერს, რომ საკვებისა და სასმელების ერთ-ერთა უმსხვილესმა მწარმოებელმა ქართულ მედიაკომპანია "იმედთან" (Imedi TV) კომერციული ურთიერთობა შეინარჩუნა მას შემდეგაც, რაც ამ უკანასკნელს დიდი ბრიტანეთის მთავრობამ თებერვალში სანქციები დაადო.

საერთაშორისო უფლებადამცველმა ორგანიზაციამ, "საერთაშორისო გამჭვირვალობამ" (Transparency International) მარტში Nestle იმ დასავლურ კომპანიებს შორის დაასახელა, რომლებმაც ტელეარხთან, მიუხედავად მისი სანქციების სიაში შეყვანისა, კავშირები შეინარჩუნეს. როგორც ცნობილია, Nestle "იმედის" ეთერში აგრძელებდა ისეთი ბრენდების რეკლამირებას, როგორებიცაა Nescafe, Nescafe Gold და Nesquik.

გამოცემა City AM-ის ინფორმაციით, Nestle-ს შიდა გამოძიებას კომპანიის იურიდიული დეპარტამენტის გლობალური ხელმძღვანელი ლიან გილი ხელმძღვანელობს, ლონდონის იურიდიული გუნდიდან კი პროცესში მარკ მორის ჯონსია ჩართული.

შეგახსენებთ 2026 წლის 24 თებერვალს დიდმა ბრიტანეთმა, რუსეთის (EU Exit) სანქციების რეგულაციების ფარგლებში, სამთავრობო პროპაგანდისტული "იმედი" და "პოსტვ" დაასანქცირა.

სანქცირებული კომპანიების ჩამონათვალი დიდი ბრიტანეთის საგარეო თანამეგობრობისა და განვითარების ოფისმა გამოაქვეყბა. მათ მიერ გავრცელებული დოკუმენტის მიხედვით, საგარეო საქმეთა სამინისტრო მიიჩნევს, რომ ტელეკომპანია "იმედი" განზრახ ავრცელებს შეცდომაში შემყვან ინფორმაციას რუსეთის უკრაინაში სრულმასშტაბიანი შეჭრის შესახებ, რაც მხარს უჭერს ან ხელს უწყობს პოლიტიკას ან ქმედებას, რომელიც დესტაბილიზაციას ახდენს უკრაინაში ან ძირს უთხრის ან საფრთხეს უქმნის უკრაინის ტერიტორიულ მთლიანობას, სუვერენიტეტს ან დამოუკიდებლობას. კერძოდ, ის რეგულარულად ავრცელებს ისეთ შინაარსის ინფორმაციას, რომ უკრაინის მთავრობა და პრეზიდენტი ზელენსკი არალეგიტიმურია, უკრაინა არის დასავლეთის "მარიონეტი", უკრაინა არის კორუმპირებული ქვეყანა და რომ უკრაინა და დასავლეთი ცდილობენ საქართველოს დესტაბილიზაციას.