ესპანეთის პრემიერმინისტრის, პედრო სანჩესის ყოფილ ტრანსპორტის მინისტრს, ხოსე ლუის აბალოსს, მთელი რიგი კორუფციული დანაშაულებისთვის, 24 წლით თავისუფლების აღკვეთა მიესაჯა. ინფორმაციას Reuters ავრცელებს.

Reuters წერს, რომ ყოფილ მინისტრს უჩვეულოდ ხანგრძლივი სასჯელი მძიმე დანაშაულების გამო მიუსაჯეს, მათ შორისაა COVID-19-ის პანდემიის დროს პირბადეების შესყიდვებიდან მიღებული ქრთამები და ის ზიანი, რომელიც საზოგადოებრივ ნდობას აბალოსის მიერ წესების დარღვევის გამო მიადგა.

"საზოგადოება, რომელიც ხედავს, რომ ძალაუფლების მქონე პირები კერძო ან საჯარო სამსახურთან შეუსაბამო ინტერესებით მოქმედებენ, კარგავს ინსტიტუციურ ლეგიტიმაციას, რაც საფრთხეს უქმნის თავად სისტემის სტაბილურობას," — ნათქვამია განაჩენში.

მიუხედავად ამისა, ესპანური კანონმდებლობით, აბალოსის მიერ ციხეში გასატარებელი რეალური დრო მაქსიმუმ 16 წლითა და 6 თვით შემოიფარგლება, განაცხადა სასამართლომ.

ეს განაჩენი იმ ფონზე გამოცხადდა, როდესაც პრემიერმინისტრთან დაახლოებული ათზე მეტი ადამიანი გამოძიების ქვეშ იმყოფება ან სასამართლოს წინაშე კორუფციის ბრალდებითაა წარდგენილი. მათ შორის არიან პრემიერის მეუღლე, ძმა და "სოციალისტების" გავლენიანი ყოფილი პრემიერმინისტრი.

დღემდე, თავად სანჩესის სახელი, რომელიც ხელისუფლებაში რვა წლის წინ მოვიდა, არცერთ საქმეში არ ფიგურირებს. Reuters წერს, რომ მან კორუფციაში ჩაფლული ცენტრისტული-მემარჯვენე მთავრობა პოლიტიკის გაჯანსაღების დაპირებით ჩაანაცვლა.