აშშ-ის პრეზიდენტმა დონალდ ტრამპმა განაცხადა, რომ შეერთებულმა შტატებმა და ირანმა ურთიერთგაგების მემორანდუმს, რომელიც ომის დასრულებას ისახავს მიზნად, ხელი უკვე მოაწერეს, თუმცა დეტალები ჯერ კიდევ არაა გასაჯაროებული. ინფორმაციას Reuters ავრცელებს.

"შეთანხმება სრულად ხელმოწერილია. სრუტე კი ნაწილობრივ გახსნილია", — განაცხადა ტრამპმა საფრანგეთში,"დიდი შვიდეულის" (G7) ლიდერების სამიტზე ჩასვლიდან მალევე.

შეთანხმების ხელმოწერის ოფიციალური ცერემონია პარასკევს, ჟენევაში უნდა გაიმართოს.

ორივე მხარის მიერ გავრცელებული ინფორმაციით, შეთანხმება ჰორმუზის სრუტის ხელახლა გახსნას და ცეცხლის შეწყვეტის რეჟიმის გაგრძელებას ითვალისწინებს 60-დღიანი მოლაპარაკებების პერიოდით, რომლის დროსაც ისეთი სადავო საკითხები უნდა გადაწყდეს, როგორიცაა ირანის ბირთვული პროგრამის მომავალი.

ამერიკელი მაღალჩინოსნების განცხადებით, შეთანხმებით გათვალისწინებული ეკონომიკური სარგებლის მიღება ირანისთვის დამოკიდებული იქნება იმაზე, შეასრულებს თუ არა ის აშშ-ის მოთხოვნას — არასოდეს შექმნას ბირთვული იარაღი.

ირანელი ოფიციალური პირები, რომლებიც ყოველთვის უარყოფდნენ ბირთვული იარაღის შექმნის განზრახვას, ამბობენ, რომ მათ მცირედი დათმეს და მიიღეს ვაშინგტონისგან პირობა სანქციების მოხსნის, გაყინული აქტივების გათავისუფლებისა და იმ ომის ზარალის ანაზღაურების შესახებ, რომელიც ტრამპმა ისრაელთან ერთად წამოიწყო.

ირანის მხარის განცხადებით, შეთანხმება ლიბანში საომარი მოქმედებების სრულ შეწყვეტას მოითხოვს, თუმცა ისრაელის პრემიერმინისტრმა, ბენიამინ ნეთანიაჰუმ განაცხადა, რომ ისრაელი შეინარჩუნებს თავის ძალებს სამხრეთ ლიბანში და დაიტოვებს უფლებას, უპასუხოს "ჰეზბოლას" თავდასხმებს.

ირანის საგარეო საქმეთა მინისტრმა აბას არაღჩიმ განაცხადა, რომ ისრაელის თავდასხმები დაუყოვნებლივ უნდა შეწყდეს.