საქართველოს გაცილებით მეტი პოზიტიური მაჩვენებელი აქვს, გაცილებით მეტ ევროპულ სტანდარტს აჩვენებს, ვიდრე სომხეთში ან ნებისმიერი კანდიდატი ქვეყანა" — ამის შესახებ პარლამენტის პირველმა ვიცესპიკერმა, გია ვოლსკიმ ჟურნალისტებთან საუბრისას განაცხადა, რომლის თქმითაც მცდარია შეფასება, თითქოს სომხეთი ევროკავშირისკენ მიისწრაფვის, ხოლო საქართველო — არა. კომენტარს IPN ავრცელებს.

როგორც ვოლსკიმ განაცხადა, ევროკავშირის დამოკიდებულება საქართველოს მიმართ რიგ შემთხვევებში ნეგატიურია და ეს განსაკუთრებით საგარეო პოლიტიკის საკითხებში იკვეთება.

"პრიმიტიული შეფასებაა, თითქოს, ევროკავშირში სომხეთი მიისწრაფვის და საქართველო არა. უბრალოდ, ევროკავშირს აქვს სხვადასხვა დამოკიდებულება სომხეთთან და საქართველოსთან მიმართებაში. რიგ შემთხვევებში, საკვანძო საკითხებთან, საქართველოსთან ევროკავშირის დამოკიდებულება არის საკმაოდ ნეგატიური. მოთხოვნებს რომ გადავხედოთ, ვხვდებით, რომ საქართველო საზარბაზნე ხორცის როლში წარმოუდგენიათ, მაშინ, როცა საგარეო კურსზეა საუბარი. მაგალითად, დაპირისპირება რუსეთთან, იქნება ეს ეკონომიკური თუ სამხედრო. ჩვენი პოლიტიკის განსხვავება არის ერთადერთი, როდესაც ვლაპარაკობთ ევროკავშირის მხრიდან საქართველოს მიმართ დამოკიდებულებაზე. ეს გაცილებით უფრო ნათელი გახდა ბოლო პერიოდში," — განაცხადა მან.

მისი თქმით, საქართველოს ევროკავშირთან დაახლოების კუთხით არაერთი უპირატესობა აქვს და ქვეყანა ევროპულ სტანდარტებს ბევრ კანდიდატ სახელმწიფოზე უკეთესად აკმაყოფილებს.

"ევროკავშირისკენ სწრაფვა როგორც სომხეთს, ასევე, საქართველოს მსგავსი გააჩნია. საქართველოს გაცილებით მეტი პოზიტიური მაჩვენებელი აქვს, გაცილებით მეტ ევროპულ სტანდარტს აჩვენებს, ვიდრე სომხეთში ან ნებისმიერი კანდიდატი ქვეყანა. ჩვენ სომხეთს წარმატებას ვუსურვებთ. მზად ვართ, ყველანაირი გამოცდილება გავუზიაროთ, თუმცა "მზად ვართ" არასწორი სიტყვაა. ჩვენ მუდმივად ურთიერთკავშირში ვართ. ევროკავშირისკენ სწრაფვა მსგავსი გვაქვს ყველა მიმართულებით, თუმცა ბრიუსელს გააჩნია გარკვეული ინტერესები, რომელიც ხშირ შემთხვევაში, არ შეესაბამება საქართველოს სტრატეგიულ ინტერესს," — აღნიშნა ვოლსკიმ.

ცნობისთვის, სომხეთში საპარლამენტო არჩევნები ჩატარდა, რომელიც კვირას, 7 ივნისს გაიმართა. გავრცელებული მონაცემების მიხედვით, პირველ ადგილზე ფაშინიანის მმართველი პარტია სამოქალაქო კონტრაქტი გავიდა ხმების 49.81%-ით.