უკრაინის პრეზიდენტმა, ვოლოდიმირ ზელენსკიმ სომხეთის პრემიერმინისტრს, ნიკოლ ფაშინიანს საპარლამენტო არჩევნებში გამარჯვება მიულოცა. ამის შესახებ მან X-ზე დაწერა.

ზელენსკის თქმით, უკრაინა თანამშრომლობის გაფართოებისთვის მზადაა და ახლა სწორედ ის დროა, როდესახ ევროკავშირმა სომხეთს რეალური მხარდაჭერა უნდა გამოუცხადოს. ვოლოდიმირ ზელენსკის თქმით, ეს ევროკავშირისთვის გამოცდაა.

"ვულოცავ სომხეთს დემოკრატიული და თავისუფალი არჩევნების ჩატარებას, ხოლო ნიკოლ ფაშინიანს — გამარჯვებას. ეს ასევე არის სომხეთის სუვერენიტეტის, თქვენი დამოუკიდებლობისა და თქვენივე არჩევანით ცხოვრების უფლების გამარჯვება. წარმატებებს გისურვებთ.

უკრაინა მზად არის გააფართოოს ჩვენი თანამშრომლობა. ახლა სწორედ ის დროა, როდესაც ევროკავშირმა რეალური მხარდაჭერა უნდა გამოუცხადოს სომხეთს და გააკეთოს ყველაფერი საჭირო, რათა ადამიანებმა იგრძნონ, რომ ევროპასთან ურთიერთობის წყალობით მათი ცხოვრება უმჯობესდება. ეს ევროკავშირისთვის გამოცდაა. მნიშვნელოვანია, არ დავკარგოთ დრო და ხელიდან არ გავუშვათ შესაძლებლობები", — დაწერა ვოლოდიმირ ზელენსკიმ.

შეგახსენებთ, სომხეთის ცენტრალურმა საარჩევნო კომისიამ საპარლამენტო არჩევნებზე ყველა — 2005-ივე საარჩევნო უბნის ხმების დათვლის წინასწარი შედეგები გამოაქვეყნა.

პრემიერმინისტრ ნიკოლ ფაშინიანის პარტია სამოქალაქო კონტრაქტმა ყველაზე მეტი — 727,160 ხმა (49.81%) მოიპოვა. სემველ კარაპეტიანის ძლიერი სომხეთი მეორე ადგილზეა 340,062 ხმით (23.29%), მას მოსდევს ყოფილი პრეზიდენტის, რობერტ ქოჩარიანის ალიანსი სომხეთი, რომელმაც 145,097 ხმა (9.94%) მიიღო. გაგიკ წარუკიანის პარტიამ აყვავებული სომხეთი 58,368 ხმით მოაგროვა ბარიერის გადასალახად საჭირო 4%.

.