გუშინ, 28 მაისის ღამეს, გორში პოლიციელების მიერ ჯგუფურად ნაცემი პაპუნა ლოცულაშვილის ჯანმრთელობის მდგომარეობა დამძიმდა, რის შემდეგაც ის კვლავ კლინიკაში გადაიყვანეს. ოჯახის ინფორმაციით, ლოცულაშვილს ძლიერი თავის ტკივილები ჰქონდა და გონება ორჯერ დაკარგა. თავის ტკივილების გარდა, თავდასხმის შედეგად მას ნეკნიც მოტეხილი აქვს.

"ამ ეტაპზე რა ინფორმაციაც მაქვს, რაც ოჯახმა მომაწოდა, თავის ქალის ტკივილები აქვს. ჰქონდა თავის ტკივილები ძლიერი და სახლში წაუვიდა გული, რის შემდეგადაც გადაიყვანეს კლინიკაში. კლინიკაში შემოწმების შედეგად, თავის ქალის ტკივილების გამო დააწვინეს ნევროლოგიურ განყოფილებაში. ასევე, აქვს ნეკნი გატეხილი და ჩემთვის როგორც ცნობილია, დღეს დატოვებენ კლინიკაში დასაკვირვებლად, რომ ზუსტი შედეგი დაიდოს, რა აწუხებს მას. სახლში წაუვიდა გული, ამიტომაც გამოიძახეს სასწრაფო," — განაცხადა პაპუნა ლოცულაშვილის ადვოკატმა, ლაშა ტყეშელაძემ IPN-თან საუბრისას.

პირველი საუნივერსიტეტო კლინიკის ექიმმა, მანანა ლობჟანიძემ, ჟურნალისტებთან განაცხადა, რომ გონების დაკარგვა ძლიერი ტკივილებით იყო გამოწვეული.

"იმყოფებოდა ვივამედის კლინიკაში, სადაც მას ჩაუტარდა კვლევები, მაგრამ პაციენტმა უარი განაცხადა სტაციონარში დარჩენაზე, გამოეწერა ბინაზე. ბინაზე ყოფნისას მისი მდგომარეობა შედარებით გაუარესდა, აღენიშნა გულისრევა, ჰქონდა თავის ტკივილი, რის გამოც გამოძახებულმა სასწრაფომ პაციენტი შემოიყვანა ჩვენს კლინიკაში. გონების კარგვის მომენტი იყო. ეს ტკივილებმა გამოიწვია მისი ეს მდგომარეობა. ახლა ჩვენთან უტარდება კვლევები და კვლევებიდან გამომდინარე მივიღებთ გადაწყვეტილებას პაციენტი მოთავსდება სტაციონარში თუ გაეწერება ბინაზე," — განაცხადა პირველი საუნივერსიტეტო კლინიკის ექიმმა მანანა ლობჟანიძემ პირველ არხთან საუბრისას.

27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე. აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო. დაკავებულია 6 პოლიციელი.