გორში პოლიციელების მიერ ნაცემი ლაშა აბისონაშვილის დედა AMBEBI.GE-თან ჰყვება, თუ როგორ მოიპოვა ტელეკომპანია ფორმულას ჟურნალისტმა, ლადო ბი­ჭაშ­ვილმა ფიზიკური ანგარიშსწორების კადრები.

ნინო ელიკაშვილის განმარტებით, პაპუნა ლოცულაშვილმა მის შვილს, ლაშა აბისონაშვილს სამსახურში შესვენებაზე მიაკითხა, რა დროსაც პოლიციელებმა მანქანა ლოცულაშვილს მიუყენეს. ლოცულაშვილის უკმაყოფილება პოლიციელებმა შეურაცყოფად მიიღეს და მისი ცემა დაიწყეს.

"როგორც გავიგე, აპირებდნენ რომ წამალი ჩაედოთ მისთვის [პაპუნა ლოცულაშვილისთვის]. არადა არანაირი შეხება წამალთან არ აქვს. მშრომელი, განათლებული ბიჭია. ყვიროდნენ თურმე შვიდ წლიან სისხლზე გაუშვიო," — განაცხადა ელიკაშვილმა.

ელიკაშვილის თქმით, ჟურნალისტი ლადო ბიჭიაშვილი შემთხვევის ადგილთან ახლოს ცხოვრობს. ჟურნალისტი ლოცულაშვილის "ყმუილმა" გააღვიძა, რის შემდეგაც მან კადრები გადაიღო.

"ერთი მოსახლე ცხოვრობს ჩვენი საწყობის თავზე, ის ერთადერთი არის ჟურნალისტი ლადო ბიჭაშვილი, რომელიც იყო იმ დროს სახლში და ეძინა. ლადო ამბობს, არაადამიანურმა ღმუილმა გამაღვიძაო, და რომ გავიხედე, ეს სიტუაცია იყოო, საბედნიეროდ მან შეძლო ამ უმძიმესი კადრების გადაღება და ამხილა მოძალადეები. მე რომ დამირეკა ჩემმა რძალმა, იმდენად დაუჯერებელი იყო, ვერ ვიგებდი რა ხდება. იქ რომ გავედით, უკვე ლენტებს ავლებდნენ, ვიკითხე, რა ხდება მეთქი, გაიგებთო, უხეშად მიპასუხა პოლიციის თანამშრომელმა, მერე ველაპარაკე ჟურნალისტ ლადო ბიჭაშვილს, უკვე მოსული იყო ჟურნალისტი გიორგი ახალკაციც და მითხრეს, ნინო, ყველაფერი გადაღებულია, ატვირთულია უკვე ფორმულაზეაო. ჩემი შვილიც გამეტებით არის ნაცემი. არაადამიანურ გმინვას რომ გაიგებ მეორე სართულზე და თან გძინავს, წარმოიდგინეთ, როგორ ყვიროდა პაპუნა ამ წამების დროს," — განაცხადა ელიკაშვილმა.

იგივე ვერსიას ჰყვება დაზარალებულის ძმა, გიგლა ლოცულაშვილი. მისი განმარტებით, მისმა ძმამ პოლიციის ეკიპაჟს მიმართა, რომ მისთის მანქანა არ დაეჯახებინათ და ამის შემდეგ გადავიდნენ თავდასხმაზე.

"მეგობარს მიაკითხა შესვენებაზე, იქ ისაუზმეს ერთად და წამოვიდა ისევ ბრუნდებოდა სამსახურში. მე როგორც ვიცი, იყო გადამოწმების მიზნით გაჩერება, გაუჩერეს ფეხებში მანქანა ძალიან ისე და ამან უთხრა, რანაირად დადიხარო, არ დამეჯახოო და რომ გადმოვიდნენ იმათ უხეშად დაუწყეს ლაპარაკი, არაფერი იქ ისეთი არ ყოფილა, შემდეგ მაიკაზე წვდა ეს ერთ-ერთი [პოლიციელი] და აი მანდ დაიწყო ყველაფერი," — განაცხადა ლოცულაშვილმა ტვ პირველთან საუბრისას.

ლოცულაშვილის თქმის მის ძმას "აქვს მოტეხილობა, დაბეჟილობები, მრავლობითი ჩალურჯებები სხეულზე და აქედან გამომდინარე მძიმედ არის. ფსიქოლოგიურადაც მძიმედ არის, სტრესშია და ფიზიკურადაც თავისთავად". ლოცულაშვილის ოჯახის მთავარი მოთხოვნაა მას ბრალდებულის სტატუსი მოეხსნას.

"ჩემს ძმას ბრალი ისევ აქვს წაყენებული და ბრალდებულის სტატუსით არის განთავისუფლებული. მოუხსნან ბრალი. ჩემი ძმა არაფერში არ არის დამნაშავე.

დააკავონ ის პირები, ვინც დამნაშავეები არიან სასტიკი და არაადამიანური მოპყრობისთვის, გადამეტებული ძალაუფლებისთვის — მთელმა ქვეყანამ ნახა, როგორი სიტყვებით აგინებდნენ [ჩემ ძმას]..." — განაცხადა პაპუნა ლოცულაშვილის ძმამ, გიგლა ლოცულაშვილმა ტვ პირველთან საუბრისას.

გორში პოლიციელების მხრიდან ფიზიკური ძალადობის მსხვერპლი, პაპუნა ლოცულაშვილი თავდაპირველად სისხლის სამართლის კოდექსის 353-ე მუხლით იყო დაკავებული, რაც პოლიციის თანამშრომლისთვის წინააღმდეგობის გაწევას გულისხმობს ძალადობის მუქარით, მისი სამსახურებრივი საქმიანობის შეწყვეტის მიზნით. მოგვიანებით ის გაათავისუფლეს. მოგვიანებით, ლოცულაშვილი სამკურნალოდ კლინიკა "ვივამედში" მოათავსეს.