პრორუსულმა არასამთავრობო ორგანიზაციებმა საქართველოში "რუსოფობიის მონიტორინგის საბჭო" დააფუძნეს. ორგანიზატორების განცხადებით, პროექტის მთავარი მიზანი საჯარო სივრცეში დისკრიმინაციის, სიძულვილის ენისა და ანტირუსული რიტორიკის შემთხვევების გამოვლენა, აღრიცხვა და ანალიზია. ინფორმაციას ამის შესახებ გამოცემა "Sputnik საქართველო" ავრცელებს.

არასამთავრობო ორგანიზაცია "ევრაზიის ინსტიტუტის" დამფუძნებელმა და მისმა მრავალწლიანმა ხელმძღვანელმა, გულბაათ რცხილაძემ "Sputnik საქართველოს" ჟურნალისტებთან ინტერვიუში აღნიშნა, საბჭო აქტიურად შეაგროვებს მონაცემებს იმ ფაქტებზე, რომლებსაც ისინი რუსოფობიის გამოვლინებად მიიჩნევენ.

მონიტორინგის სამიზნე ჯგუფში შედის:

  • რუსეთის შესახებ ყალბი ინფორმაციის (დეზინფორმაციის) გავრცელება;

  • ისტორიული მოვლენების სავარაუდო დამახინჯება;

  • ენობრივი ან ეთნიკური კუთვნილების საფუძველზე ადამიანების დისკრიმინაცია.

პროექტის ავტორები ხაზს უსვამენ, რომ დაკვირვება შეეხება მხოლოდ საჯარო სივრცეს — ფიზიკური და იურიდიული პირების საჯარო განცხადებებს, მედიაპუბლიკაციებსა და ქმედებებს.

მონიტორინგის პარალელურად, საბჭოს ბაზაზე იქმნება სპეციალური იურიდიული ჯგუფი. ეს ჯგუფი შეაფასებს გამოვლენილ შემთხვევებს სამართლებრივ ჭრილში და, საჭიროების შემთხვევაში, სააპელაციო საჩივრების მომზადებასაც უზრუნველყოფს. საბჭო მიღებულ შედეგებსა და სტატისტიკას პერიოდულად, სამ თვეში ერთხელ, საჯარო ანგარიშების სახით გამოაქვეყნებს.

განსაკუთრებული ყურადღება დაეთმობა 2022 წლის თებერვლის — უკრაინაში რუსეთის სრულმასშტაბიანი შეჭრის — შემდგომ პერიოდს. ინიციატივის ავტორთა მტკიცებით, სწორედ ბოლო წლებში საქართველოში ანტირუსული განცხადებებისა და საპროტესტო აქციების რაოდენობა საგრძნობლად გაიზარდა, რაც მათ შეშფოთებას იწვევს.

ორგანიზატორებმა ქვეყნის ხელისუფლებასაც მიმართეს და მოუწოდეს, ხელი შეუწყოს ქსენოფობიისა და დისკრიმინაციის ყველა ფორმის წინააღმდეგ ბრძოლას. მათი პოზიციით, ეროვნული და ენობრივი მრავალფეროვნების პატივისცემა ქვეყანაში სოციალური სტაბილურობის შენარჩუნების აუცილებელი პირობაა.