ფეხბურთის საერთაშორისო ფედერაციამ (FIFA) დაადასტურა, რომ მსოფლიო ჩემპიონატის ფინალის ისტორიაში პირველ Halftime Show-ს მთავარი ვარსკვლავები შაკირა, მადონა და BTS იქნებიან.

მსოფლიო ჩემპიონატის ფინალი 19 ივლისს, ნიუ-ჯერსის MetLife Stadium-ზე გაიმართება. სტადიონზე შეკრებილი გულშემატკივრების გარდა, შოუს პირდაპირ ეთერში მილიონობით ადამიანი უყურებს.

ფოტო: ESPN

2026 წლის მსოფლიო ჩემპიონატი 11 ივნისს მექსიკაში იწყება. მატჩები აშშ-ის, კანადისა და მექსიკის სხვადასხვა ქალაქში ჩატარდება.

FIFA-ს განცხადებით, ფინალის Halftime Show-ს კურატორი Coldplay-ს სოლისტი კრის მარტინია. პროექტის პროდიუსერი არაკომერციული ორგანიზაცია Global Citizen იქნება, ხოლო შემოსული თანხა განათლების ფონდს (FIFA Global Citizen Education Fund) გადაერიცხება. ფონდის მიზანი $100 მილიონის შეგროვებაა, რათა მთელი მსოფლიოს ბავშვებისთვის ხარისხიანი განათლება და ფეხბურთი უფრო ხელმისაწვდომი გახდეს.

FIFA-ს პრეზიდენტმა, ჯანი ინფანტინომ, ფინალის შესახებ განაცხადა: "ეს იქნება ისტორიული მომენტი მსოფლიო ჩემპიონატისთვის და შოუ, რომელიც მსოფლიოს უდიდეს სპორტულ მოვლენას შეეფერება".

ფოტო: Asia News

ფეხბურთის ასოციაციების საერთაშორისო საბჭოს (IFAB) მიერ დადგენილი ოფიციალური წესების თანახმად, მატჩის შესვენების ხანგრძლივობა 15 წუთს არ უნდა აღემატებოდეს. ჯერჯერობით უცნობია, შეიცვლება თუ არა ეს წესი ფინალური შოუსთვის ამერიკული Super Bowl-ის მსგავსად.

FIFA-მ ასევე დაადასტურა, რომ მსოფლიო ჩემპიონატს მეხიკოში J Balvin გახსნის. გრანდიოზულ შოუში მონაწილეობას სხვა ცნობილი არტისტებიც მიიღებენ, მათ შორის: ალეხანდრო ფერნანდესი, ბელინდა, დენი ოუშენი, ლილა დაუნსი, Los Ángeles Azules, Maná და Tyla.