უკრაინის ანტიკორუფციულმა უმაღლესმა სასამართლომ (HACC) უკრაინის პრეზიდენტის ოფისის ყოფილ ხელმძღვანელს, ანდრეი ერმაკს, აღკვეთის ღონისძიების სახით 60-დღიანი პატიმრობა შეუფარდა. სასამართლოს 14 მაისის გადაწყვეტილებით, ეჭვმიტანილს უფლება ეძლევა პატიმრობა 140 მილიონი გრივნის (დაახლოებით $3.2 მლნ) ოდენობის გირაოთი შეცვალოს. ინფორმაციას უკრაინული მედია ავრცელებს.

მოსამართლის განცხადებით, ანტიკორუფციული ბიუროს (NABU) შუამდგომლობა ნაწილობრივ დაკმაყოფილდა. იმ შემთხვევაში, თუ ერმაკი გირაოს გადახდას შეძლებს, მასზე რამდენიმე მკაცრი შეზღუდვა გავრცელდება: ის ვალდებული იქნება გამოცხადდეს საგამოძიებო ორგანოებში ყოველი მოთხოვნისთანავე; ეკრძალება კიევის დატოვება; უნდა ჩააბაროს სამგზავრო პასპორტები; ეკრძალება კომუნიკაცია საქმეში მონაწილე სხვა ეჭვმიტანილებთან (ჩერნიშოვთან, მინდიჩთან, ლისენკოსთან და სხვებთან); ასევე, ვალდებულია მუდმივად ატაროს ელექტრონული სამაჯური.

თავად ანდრეი ერმაკმა სასამართლო პროცესზე განაცხადა, რომ გირაოს გადასახდელად თანხა არ აქვს და მხოლოდ "მეგობრების" დახმარების იმედი აქვს. მისმა ადვოკატებმა გადაწყვეტილების გასაჩივრება უკვე დააანონსეს.

შეგახსენებთ, გამოძიება ერმაკს კიევის ოლქში, კოზინში მდებარე ელიტარული კოტეჯების კომპლექსის — Dynasty-ს მშენებლობის პროცესში 460 მილიონი გრივნის გათეთრებას ედავება. საგამოძიებო ორგანოების (NABU და SAP) ვერსიით, აღნიშნული თანხები ნაწილობრივ "ენერგოატომში" არსებული კორუფციული სქემებიდან იყო მოპოვებული.

ცნობისთვის, პროკურატურა ერმაკისთვის 180-მილიონიან გირაოს ითხოვდა, თუმცა სასამართლომ თანხა 140 მილიონამდე შეამცირა. განჩინების სრული ტექსტი 18 მაისს გამოქვეყნდება.