ფოთისა და ხობის ეპარქიამ სრულიად საქართველოს კათოლიკოს-პატრიარქობის კანდიდატის, მიტროპოლიტ გრიგოლის პროგრამული ხედვის ძირითადი პრინციპები გამოაქვეყნა. წერილში, რომელიც ილია II-ის გარდაცვალების შემდგომ შექმნილ ახალ რეალობას ეხება, მღვდელმთავარი ეკლესიის მართვისა და სოციალური მისიის განახლების კონკრეტულ გზებს სახავს.

მიტროპოლიტ გრიგოლის ხედვით, ეკლესიის გაძლიერება-განმტკიცებისა და საზოგადოების სულიერი ერთობის მისაღწევად შემდეგი ნაბიჯებია გადასადგმელ:

  1. საეკლესიო დებულების ჰარმონიზაცია;

  2. კრებსითი მმართველობის გაძლიერება;

  3. მღვდელმსახურთა სოციალური მხარდაჭერა;

  4. საეკლესიო სოციალური დოქტრინის განვითარება;

  5. საღვთისმეტყველო განათლება და მისიონერობა;

  6. ახალგაზრდობის ეკლესიურ ცხოვრებაში ჩართვა;

  7. საეკლესიო ტრადიციის დაცვა;

  8. საზღვარგარეთის ეპარქიები და დიასპორა.

მიტროპოლიტი გრიგოლი პირველ რიგში ეკლესიის შიდა წესრიგზე ამახვილებს ყურადღებას. მისი ხედვით, აუცილებელია საეკლესიო დებულების ჰარმონიზაცია თანამედროვეობის გამოწვევებთან, რათა აღმოიფხვრას არსებული სამართლებრივი ბუნდოვანება. ამასთანავე, კანდიდატი კრებსითი მმართველობის გაძლიერების ინიციატივით გამოდის, რაც სინოდის სხდომების უფრო ხშირად ჩატარებასა და მღვდელმთავრების გადაწყვეტილებების მიღების პროცესში რეალურ ჩართულობას გულისხმობს.

პროგრამის ერთ-ერთი მთავარი ნაწილი სასულიერო პირთა სოციალურ მდგომარეობას ეთმობა. მიტროპოლიტი გამოდის ინიციატივით, შეიქმნას ფინანსური უზრუნველყოფის გამჭვირვალე სისტემა, რომელიც სოფლებსა და მცირე ქალაქებში მოღვაწე მღვდელმსახურებს მინიმალურ სოციალურ სტანდარტს გარანტირებულად შეუქმნის.

ეკლესიის საზოგადოებრივი როლის გასაძლიერებლად, პატრიარქობის კანდიდატი "საეკლესიო სოციალური დოქტრინის" შექმნის აუცილებლობაზე საუბრობს. ეს დოკუმენტი ეკლესიის პოზიციას ისეთ რთულ საკითხებზე განსაზღვრავს, როგორიცაა ბიოეთიკა, ხელოვნური ინტელექტი და სოციალური კრიზისები. პარალელურად, პროგრამა ითვალისწინებს ახალგაზრდობის ეკლესიურ ცხოვრებაში ჩართვას ციფრული პლატფორმებისა და საგანმანათლებლო ჯგუფების მეშვეობით.

განათლებისა და ტრადიციის დაცვის ჭრილში, მიტროპოლიტი გრიგოლი მიიჩნევს, რომ მონასტრები სულიერ-საგანმანათლებლო ცენტრებად უნდა იქცეს, ხოლო ქართული საღვთისმეტყველო მემკვიდრეობა საერთაშორისო დონეზე უნდა იქნას პოპულარიზებული. განსაკუთრებული ყურადღება ეთმობა დიასპორასა და საზღვარგარეთის ეპარქიებს, სადაც ეკლესიამ კიდევ უფრო აქტიურად უნდა იზრუნოს ეროვნული იდენტობისა და ენის შენარჩუნებაზე.

დასკვნით ნაწილში მიტროპოლიტი ხაზს უსვამს, რომ ამ ამოცანების შესრულება ეკლესიის პრიორიტეტია და ამ გზაზე მას ქართული საზოგადოებისა და მედიის მხარდაჭერის იმედი აქვს, რათა თანამშრომლობა კონსტრუქციულ და სახელმწიფოსთვის სასარგებლო რეჟიმში წარიმართოს.

განცხადება სრულად იხილეთ აქ.

შეგახსენებთ, 28 აპრილის სინოდის სხდომაზე, მღვდელმთავრებმა პატრიარქობის სამი კანდიდატი გამოარჩიეს.

სინოდის სხდომის ოქმის მიხედვით, კენჭისყრის შედეგად ხმები შემდეგნაირად გადანაწილდა:
საპატრიარქო ტახტის მოსაყდრე, სენაკისა და ჩხოროწყუს მიტროპოლიტმა შიო. 20 ხმა მიიღო; მროველ-ურბნელმა მიტროპოლიტმა იობმა – 7 ხმა; ფოთისა და ხობის მიტროპოლიტმა გრიგოლმა — 7 ხმა; მარგვეთისა და უბისის ეპისკოპოსმა მელქისედეკმა – 0 ხმა; ბელგიისა და ჰოლანდიის ეპისკოპოსმა დოსითემ — 1 ხმა; წალკელმა ეპისკოპოსმა გრიგოლმა – 2 ხმა.
მისივე ცნობით, ერთ ბიულეტენზე არცერთი კანდიდატის სახელი არ დაფიქსირდა, ამიტომ ის ბათილად იქნა მიჩნეული.