ამბობენ, ისტორიას გამარჯვებულები წერენო, თუმცა ზოგჯერ მას გაბრაზებული ან მოსყიდული მემატიანეებიც ქმნიან, ხანდახან კი, რეალური ამბები თარგმანშიც იკარგება. სკოლის სახელმძღვანელოებიდან თუ ჰოლივუდის ფილმებიდან ბევრი ისტორიული "ფაქტი" ისე დაგვამახსოვრდა, რომ მათ ჭეშმარიტებაში ეჭვი არასდროს შეგვპარვია. თუმცა, ეს ისტორიები ჩვენნაირი ადამიანების დაწერილია, რომლებსაც, გამიზნულად თუ შემთხვევით, თავისუფლად შეეძლოთ სიცრუის გავრცელება.

ამ სტატიაში წარმოგიდგენთ 5 ისტორიულ ტყუილს, რომლებიც დღემდე გვჯერა:

1. კლეოპატრა თავისი არაამქვეყნიური სილამაზით ყველა კაცს აჯადოებდა

ანტიკური ხანის ისტორიკოსებზე უფრო დიდ შთაბეჭდილებას კლეოპატრას ინტელექტი და მანიპულაციის ბუნებრივი ნიჭი ახდენდა. მხოლოდ საუკუნეების შემდეგ დაიწყო მისი, როგორც სექსუალური და მაცდუნებელი ქალის, რეპუტაციის ჩამოყალიბება.

პტოლემეების დინასტიის წარმომადგენლები უცნაური გარეგნობით იყვნენ ცნობილნი. როგორც ამბობენ, კლეოპატრა თავისი ოჯახის სხვა წევრებთან შედარებით საშუალოზე უკეთ გამოიყურებოდა, თუმცა ისტორიკოსების, მაგალითად, პლუტარქეს თქმით, საერთო აზრი ის იყო, რომ: "მისი სილამაზე არც ისე შეუდარებელი და განმაცვიფრებელი იყო".

ასევე, მცდარი წარმოდგენაა ისიც, თითქოს კლეოპატრა ეგვიპტელი იყო. პტოლემეების დინასტიის წარმომადგენლები მაკედონელი ბერძნების შთამომავლები იყვნენ. პტოლემე, რომელმაც საფუძველი ჩაუყარა ამ დინასტიას, ალექსანდრე მაკედონელის ერთ-ერთი გენერალი იყო. მან ეგვიპტე ალექსანდრეს გარდაცვალებისა და მისი იმპერიის დაშლის შემდეგ ჩაიგდო ხელში.

აღსანიშნავია, რომ კლეოპატრა პტოლემეების დინასტიიდან პირველი იყო, ვინც ეგვიპტურ ენაზე საუბარი ისწავლა.

2. "დაე, ჭამონ ნამცხვარი"

გავრცელებული მითია, თითქოს საფრანგეთის დედოფალმა მარი ანტუანეტმა გაჭირვებული ფრანგი მოსახლეობის შესახებ განაცხადა, თუ პური არ აქვთ, ნამცხვრები ჭამონო. სინამდვილეში ეს ფრაზა ფილოსოფოს ჟან-ჟაკ რუსოს მიერ გამოქვეყნებული ავტობიოგრაფიიდან გავრცელდა და მას ხშირად მცდარად მიაწერენ დედოფალს.

3. ჰენრი VIII თავის მეოთხე ცოლს, ანა კლეველს, სიუშნოვის გამო გაშორდა

როდესაც ანა პირველად ჩავიდა ინგლისში, ჰენრიმ ჩათვალა, რომ მასთან პირველი შეხვედრისას შენიღბვა რომანტიკული იქნებოდა. როდესაც გადაცმულმა ჰენრიმ ანას კოცნა სცადა, ქალს წარმოდგენაც კი არ ჰქონდა, რომ მის წინაშე მეფე იდგა, ამიტომ უკან დაიხია. შერცხვენილი ჰენრი ანას მიმართ უარყოფითად ამ მიზეზით განეწყო.

4. ნერონი რომის ხანძრის ფონზე უკრავდა

ეს ტაციტუსისა და სხვა რომაელი ისტორიკოსების მიერ აღწერილ ჭორებს შორის მხოლოდ ერთ-ერთია. ნერონი ხანძრის დროს ინსტრუმენტზე არ უკრავდა და ისე არ შეჰყურებდა ამ ამბავს, რადგან რომში საერთოდ არ იმყოფებოდა (ის სანაპიროზე, კერძო მამულში დასასვენებლად იყო წასული). მას შემდეგ, რაც გაიგო, რომ რომში ხანძარი მძვინვარებდა, იგი დაუყოვნებლივ გაემართა ქალაქისკენ და ხალხისა და შენობების გადასარჩენად სახანძრო რაზმები შეკრიბა. მოგვიანებით კი, მილიონობით სესტერცი გაიღო ქალაქის აღსადგენად.

5. ნაპოლეონი დაბალი იყო

სინამდვილეში, ნაპოლეონი იმ დროისთვის საშუალო სიმაღლის გახლდათ. სამი სხვადასხვა ფრანგი თვითმხილველის ცნობით, მისი სიმაღლე 5 ფუტსა და 2 დიუმზე ოდნავ მეტი იყო, თუმცა ფრანგული დიუმი სტანდარტული 2,54 სანტიმეტრის ნაცვლად დაახლოებით 2,7 სანტიმეტრს შეადგენდა. ეს ნიშნავს, რომ მისი სიმაღლე სინამდვილეში 169 სანტიმეტრი იყო, რაც იმ დროისთვის საშუალო მაჩვენებელზე მხოლოდ 2,5 სანტიმეტრით ნაკლებია.

მითი, რომ ნაპოლეონი დაბალი იყო, ბრიტანული პროპაგანდის დამსახურებაა, რომელიც მე-18 საუკუნის კარიკატურისტმა, ჯეიმს გილრეიმ წამოიწყო.