სტატია შეიცავს სპოილერებს Euphoria-ს მესამე სეზონიდან.

Euphoria-ს მესამე სეზონის ახალ ეპიზოდში მაყურებელმა ერთ-ერთი მთავარი პერსონაჟის სასტიკი სიკვდილის სცენა იხილა.

საქორწინო ღამის ჩაშლისა და თითების მოჭრის შემდეგ, ნეით ჯეიკობსი ცოცხლად დამარხეს ორმოში, სადაც შხამიანი გველი ჩაძვრა და უკბინა. ნეითის მსგავსი დასასრული არასწორი ფინანსური გარიგების შედეგი იყო.

ნაზი, სომხურ-ამერიკული წარმოშობის გავლენიანი და სასტიკი ნარკოდილერი.

ფოტო: HBO

ერთ-ერთ ინტერვიუში Euphoria-ს რეჟისორმა, სემ ლევინსონმა, დეტალურად ისაუბრა იმის შესახებ, თუ როგორ გადაწყდა ნეითის სიკვდილი. სერიალის დასაწყისიდანვე ნეითი სერიალის ერთ-ერთი მთავარი პერსონაჟი იყო, რომელმაც მაყურებელს თავი მანიპულაციური და მოძალადე ბუნებით დაამახსოვრა.

"ზუსტად ვიცი, მაყურებელს სამართლიანობის აღსრულება და კარმის დაბრუნება უნდა. სწორედ ამიტომ, მუდმივად ვფიქრობ, როგორ მივცე მაყურებელს ის, რაც ასე ძალიან სურს. მაგრამ, ამავდროულად, ეს ყველაფერი ისეთი შემზარავი და სულისშემძვრელი უნდა იყოს, რომ გადამწყვეტ წუთს თავადვე გაუჩნდეთ კითხვა: ნამდვილად ეკუთვნოდა ნეითს მსგავსი დასასრული? მისი დასჯა და სამაგიეროს გადახდა გინდოდათ? ინებეთ," — განაცხადა სემ ლევისონმა.

ლევინსონის თქმით, მისი თავდაპირველი იდეა ნეითის ცოცხლად დამარხვით გაგუდვა ან სიცხისგან სიკვდილი იყო. თუმცა, რეჟისორმა განმარტა, რომ ეს გეგმა მაშინ შეიცვალა, როდესაც სამსახურში მეუღლესთან ერთად მანქანით მიდიოდა. მას უცებ თვალწინ დაუდგა სურათი, თითქოს ნეითი კუბოს შიგნიდან აბრახუნებდა, გველი კი მიწის ქვეშ მის მოძრაობას გრძნობდა. სწორედ მაშინ დაიბადა იდეა: რა მოხდებოდა, ნეითი კუბოში ამ ჩხრიალა გველთან რომ აღმოჩენილიყო.

რეჟისორმა თავიდანვე იცოდა, რომ ნეითის ისტორია ამ სეზონში უნდა დასრულებულიყო. პერსონაჟმა, რომელმაც პირველ ორ სეზონში უამრავი ტკივილი, ტრავმა და ძალადობა გამოიარა, მესამე სეზონში ადამიანური მხარეც გამოავლინა. ამით სემ ლევისონმა მისი პერსონაჟის მიმართ ემპათიის გრძნობა გააჩინა. ბოლო სეზონში ნეითის პერსონაჟის ცვლილება ერთგვარი მზადება იყო იმისთვის, რაც მეშვიდე ეპიზოდში მოხდა.

"სწორედ ეს იყო ყველაზე საინტერესო იმაში, რომ პერსონაჟებმა სკოლის კედლები დატოვეს. ისინი უკვე რეალურ სამყაროში არიან და მათი ქმედებების შედეგებიც რეალურია. ამ რეალობაში წარმატებას შეგიძლია მიაღწიო, მაგრამ ამავდროულად, მზად უნდა იყო, რომ შენივე გადაწყვეტილებების შედეგებთან ერთად მოგიწევს ცხოვრება," — დასძინა სემ ლევისონმა.

ეპიზოდის გამოსვლის შემდეგ, ჯეიკობ ელორდიმ აღნიშნა, რომ მისი პერსონაჟისთვის ეს საკმაოდ შთამბეჭდავი დასასრული იყო, თავად კუბოში გადაღებების პროცესს კი "მშვიდი" უწოდა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…