შალვა პაპუაშვილის შეფასებით, 26 მაისს "ოპოზიციის ალიანსის" მიერ ორგანიზებულ აქციაში მონაწილეები "რამდენიმე ათასიანი Facebook-ბაბლია, რომელსაც თავი საზოგადოებად წარმოუდგენია და სინამდვილეში Facebook-ის ერთი "ფრენდლისტია".

პაპუაშვილმა ასევე დასძინა, რომ აღნიშნული აქცია ოპოზიციისთვის "ფინალური აკორდი" იყო და მათი მთავარი მოწოდება საზოგადოების გახლეჩვაა.

"ვფიქრობ, გუშინდელი საღამო იყო ფინალური აკორდი იმის დასანახად, რომ საქართველო ნამდვილად იმსახურებს უკეთეს ოპოზიციას. ჩვენ ვნახეთ, რაც არ უნდა, როგორც იტყვიან, რაც არ უნდა ჭირი მალო, ჭირი მაინც თავს არ დამალავსო, და არ დამალა ამ ჭირმა თავისი [თავი] და ვნახეთ ჩვენ გუშინ "ნაცმოძრაობის" აქცია მთელი თავისი ესთეტიკით, პლაკატებით, მოწოდებებით, სახეებით, მიხეილ სააკაშვილის და მისი რეჟიმის მაღალჩინოსნების — გვარამიას, ბოკერიას, ვაშაძის მიერ ორგანიზებული, ორგანიზებული ღონისძიება. ეს არის, სინამდვილეში, კიდევ ერთხელ, რაც დაინახა ქართველმა ხალხმა. ადამიანები, რომლებიც მოწადინებული არიან, რომ გახლიჩონ საზოგადოება მაშინ, როდესაც ქვეყანა ზეიმობს, ჩააშხამონ ადამიანებს ზეიმი. ვნახეთ გუშინ მათი მცდელობები, რომ რაიმენაირად ყოფილიყო რადიკალური მუხტი მათი მხრიდან, მაგრამ ეს მუხტიც აღარ აქვთ უკვე და დაკარგულია დიდი ხანია. ასე რომ, ვფიქრობ, გუშინდელი დღე იყო განაჩენი რადიკალური ოპოზიციისთვის. ის რამდენიმე ათასი ადამიანი, რომელიც მათ გარშემო არის შემოკრებილი, ეს არის ზუსტად ის რამდენიმე ათასი ადამიანი არის Facebook-ბაბლი, რომელსაც თავი საზოგადოებად წარმოუდგენია და სინამდვილეში Facebook-ის ერთი "ფრენდლისტია". მათი მოწოდებებიდანაც ჩანდა, რომ უნდოდათ სოციალურ ქსელებში გამოჩენილიყვნენ და სხვებისთვის საკუთარი თავი დაენახათ," — განაცხადა შალვა პაპუაშვილმა 26 მაისს "ოპოზიციის ალიანსის" მიერ ორგანიზებულ აქციაზე.

შეგახსენებთ, 26 მაისს ოპოზიციის ალიანსის მიერ ორგანიზებული საპროტესტო აქციის მონაწილეები თსუ-ის I კორპუსიდან მსვლელობით რუსთაველის გამზირზე მივიდნენ და, შსს-ს მხრიდან საჭირო აპარატურის შეტანაზე უარის მიუხედავად, საპროტესტო აქცია მაინც გამართეს.