საქართველოს ცენტრალურ საარჩევნო კომისიაში ამბობენ, რომ თუ საქართველოს პატრიარქის, ილია მეორისთვის ხმის მიცემის დროს მარკირების არ გაკეთებაზე საჩივარი იქნება მას განიხილავენ და რეაგირებაც შესაბამისი იქნება. ამის შესახებ ცესკოს პრესსპიკერი, ანა მიქელაძე On.ge-ს ესაუბრა.

მიქელაძის თქმით, მარკირების მთავარი მიზანი პიროვნების იდენტიფიცირება და ხელმეორედ ხმის მიცემის გამორიცხვაა.

"საქართველოს პატრიარქის ცნობადობა ძალიან მაღალია. გარდა ამისა, გამორიცხულია, რომ ის მეორედ მივიდეს საარჩევნო უბანზე. შესაბამისად, კომისიის წევრებმა ასე გადაწყვიტეს და არ გაუკეთეს მარკირება... თქვენ გაქვთ ვარაუდი, რომ საქართველოს პატრიარქი კარუსელის მონაწილე იქნება?" - განაცხადა მიქელაძემ, რომელმაც საქართველოს კანონმდებლობის მოთხოვნაც გაიხსენა, რომლითაც ხმის მიცემა საარჩევნო უბანზე მხოლოდ მარკირების შემდეგაა შესაძლებელი.

კითხვაზე - შეუძლიათ თუ არა საარჩევნო კომისიის წევრებმა საზოგადოებისთვის ცნობილ სხვა ადამიანებსაც არ გაუკეთონ მარკირება იმავე მოტივით - ცესკოში ასე პასუხობენ:

"მსგავსი ფაქტი და პრეცედენტი ჯერ არ ყოფილა დაფიქსირებული. თუ დაფიქსირდება მსგავსი პრეცედენტი, საჩივრის შემთხვევაში, განიხილავს ცესკო".

საქართველოს მართლმადიდებელი ეკლესიის პატრიარქმა ხმა წელსაც მარკირების გარეშე მისცა. ხმის მიცემამდე, საარჩევნო კომისიის რეგისტრატორმა ილია მეორეს ხელზე აკოცა, რის შემდეგაც პატრიარქი საარჩევნო კაბინაში შევიდა ხმის მისაცემად.