რუსეთის საგარეო საქმეთა სამინისტრომ გერმანიის ელჩს, ალექსანდრე გრაფ ლამბსდორფს, მკაცრი პროტესტი გამოუცხადა. დიპლომატიური უწყების უკმაყოფილების მიზეზი კიევში გამართული შეხვედრა გახდა, რომელშიც გერმანიის მმართველი პარტიის, ქრისტიან-დემოკრატიული კავშირის (CDU) დეპუტატი როდერიხ კიზევეტერი და ჩეჩნური სეპარატისტული მოძრაობის ლიდერი, ახმედ ზაკაევი მონაწილეობდნენ. ამის შესახებ რუსეთის საგარეო უწყების პრესრელიზში წერია.

მოსკოვის განცხადებით, ბუნდესტაგის წევრისა და ზაკაევის შეხვედრა, რომელიც უკრაინის ხელისუფლების ორგანიზებით შედგა, "რუსეთის შიდა საქმეებში ჩარევის უტყუარი მტკიცებულებაა."

რუსეთის საგარეო უწყება ამტკიცებს, რომ გერმანელი დეპუტატი იმ ძალების საქმიანობას მიესალმა, რომლებიც ბელგოროდისა და კურსკის ოლქებში დივერსიულ აქტებს ახორციელებდნენ. ოფიციალური მოსკოვის მტკიცებით, კიზევეტერმა ზაკაევს მოუწოდა, გერმანიაში მცხოვრები რუსეთის მოქალაქეების გადაბირების გზით, რუსეთში სოციალურ-პოლიტიკური ვითარების დესტაბილიზაციას შეუწყონ ხელი.

რუსეთი მიიჩნევს, რომ გერმანია "კიევის რეჟიმის ეგიდით" ტერორისტულ ორგანიზაციებთან პირდაპირ თანამშრომლობს.

რუსეთის საგარეო საქმეთა სამინისტრომ გერმანია მოსალოდნელი "დამღუპველი შედეგების" შესახებ გააფრთხილა და აღნიშნა, რომ ნებისმიერ "მტრულ ქმედებას" გარდაუვალი და შესაბამისი პასუხი მოჰყვება.

აღსანიშნავია, რომ გერმანიის კანცლერის, ფრიდრიხ მერცის პარტიის (CDU) წევრი როდერიხ კიზევეტერი უკრაინის აქტიური მხარდაჭერითა და რუსეთის მიმართ მკაცრი პოზიციით გამოირჩევა. გერმანულ მხარეს აღნიშნულ პროტესტზე ოფიციალური კომენტარი ჯერ არ გაუკეთებია.