საქართველოს პროკურატურამ დიდი ოდენობით ნარკოტიკული საშუალების უკანონო შეძენის, შენახვის და რეალიზაციის ხელშეწყობის ფაქტებზე უცხო ქვეყნის მოქალაქეებს ბრალდება წარუდგინა. ამის შესახებ ინფორმაციას პროკურატურა სოციალურ ქსელში ავრცელებს.

POG-ის ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ საქართველოში მყოფმა უცხო ქვეყნის ორმა მოქალაქემ უკანონოდ შეიძინეს განსაკუთრებით დიდი ოდენობით ნარკოტიკული საშუალება — 76,7 გრამი მეთადონი. აქედან, 18.90 გრამი ნარკოტიკული საშუალება განათავსეს სხვადასხვა ლოკაციებზე, საჯაროდ ხელმისაწვდომ ადგილზე, ხოლო 34 ცალად დაფასოებული, განსაკუთრებით დიდი ოდენობით ნარკოტიკული საშუალება მეთადონი, საერთო რაოდენობით 21.87 გრამი ამოღებულია მათი პირადი ჩხრეკის შედეგად. სამართალდამცველებმა მათი დროებითი საცხოვრებელი სახლის ჩხრეკისას 28 შეკვრად დაფასოებული 19.84 გრამი და 16.09 გრამი დაუფასოებელი ნარკოტიკული საშუალება მეთადონი ამოიღეს.

დაკავებულებს ბრალდება საქართველოს სისხლის სამართლის კოდექსის 260-ე მუხლის მე-3 ნაწილის „ა“ ქვეპუნქტითა (განსაკუთრებით დიდი ოდენობით ნარკოტიკული საშუალების უკანონო შეძენა-შენახვა) და 260 -ე კვარტა მუხლის მეექვსე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა) წარედგინათ, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.