რუმინეთის საგარეო საქმეთა მინისტრი ოანა-სილვია ცოიუ აცხადებს, რომ საქართველოში პრორუსული გავლენის საპირწონედ აუცილებელია პროევროპული ალტერნატივის გაძლიერება. აღნიშნული განცხადება მან ევროკავშირის საგარეო საქმეთა მინისტრების შეხვედრამდე გააკეთა. ინფორმაციას IPN ავრცელებს.

მისი თქმით, მაკა ბოჭორიშვილთან საუბრისას, რუმინეთისა და ევროპული მხარის სახელით მან მკაფიო გზავნილები გადასცა საგარეო უწყების ხელმძღვანელს სასამართლო სისტემის რეფორმებისა და დემოკრატიული პროცესების დაცვის აუცილებლობაზე.

"ვესაუბრე საქართველოს საგარეო საქმეთა მინისტრს. მე რუმინეთისა და ევროპული მხარის სახელით მკაფიო გზავნილი გადავეცი სასამართლო სისტემის რეფორმებისა და ზუსტი დემოკრატიული პროცესების დაცვის აუცილებლობის შესახებ. მაგრამ, ასევე, ჩვენ იქ პრორუსული გავლენის ალტერნატივის შექმნა უნდა გავაგრძელოთ," — განაცხადა ცოიუმ.

მისივე განმარტებით, ეს ალტერნატივა ეკონომიკურ განვითარებას უკავშირდება.

"ეს ალტერნატივა კი ნათელია ეკონომიკური ზრდისა და დაკავშირებადობის თვალსაზრისით, რასაც ჩვენთვის, შავი ზღვის რეგიონში კიდევ უფრო დიდი მნიშვნელობა აქვს," — აღნიშნა მან.

ოანა-სილვია ცოიუმ ასევე უპასუხა "ევროსკოპის" შეკითხვას და განაცხადა, თუ რა იქნება მისი გზავნილი საქართველოს საკითხზე ევროკავშირის საგარეო საქმეთა მინისტრების დღევანდელ შეხვედრაზე. მისი თქმით, ევროკავშირს სჯერა ქართველი ხალხის ევროპული არჩევანის, თუმცა პროგრესისთვის აუცილებელია რეფორმები.

"ჩვენ გვჯერა, რომ ქართველი ხალხი ევროპულ ოცნებასთან არის დაკავშირებული. ჩვენ დიალოგის განახლების აუცილებლობის შესახებ განვაცხადეთ, თუმცა ამისთვის რეფორმების გატარებაა საჭირო," — განაცხადა მან.

ცოიუმ განსაკუთრებული ყურადღება გაამახვილა მართლმსაჯულების სისტემაზე და აღნიშნა, რომ სასამართლო არ უნდა გამოიყენებოდეს პოლიტიკური ზეწოლის ინსტრუმენტად.

"დაკავებული ოპოზიციის ლიდერები ნამდვილი მართლმსაჯულების სისტემის წინაშე უნდა წარდგნენ და მართლმსაჯულების სისტემის დემოკრატიულ პროცესებში ჩარევის ინსტრუმენტად გამოყენება არ უნდა ხდებოდეს. ჩვენ ასევე ვისაუბრეთ უსაფრთხოების შესახებ. ეს ჩვენი საუბრისას ჩემი კოლეგის მთავარი პერსპექტივა იყო და ასევე, ის ფაქტი, რომ დაკავშირებადობა, ღია დიალოგი და ჩვენი უნარი, შევქმნათ პრორუსული გავლენის პროევროპული ალტერნატივა, წინსვლის გზას წარმოადგენს," — განაცხადა რუმინეთის საგარეო საქმეთა მინისტრმა.

მისივე თქმით, საქართველოს მხრიდან მნიშვნელოვანია ევროკავშირთან დიალოგის გაგრძელების საკითხის გადახედვაც.

"მნიშვნელოვანია გვესმოდეს, რომ ჩვენ ერთგულები ვართ როგორც ქართველი ხალხის ევროპული მომავლის, ისე ევროპული ალტერნატივის შექმნის მიზნით დაკავშირებადობის გაძლიერების მიმართ. ასევე, ჩვენ გვჯერა, რომ დემოკრატია მაშინ ფუნქციონირებს, როდესაც ოპოზიცია არსებობს," — აღნიშნა ცოიუმ.