ევროპის საბჭოს ადამიანის უფლებათა კომისარმა, მაიკლ ო'ფლაერტიმ საქართველოში ვიზიტი დაასრულა. ინფორმაციას ევროსაბჭო ავრცელებს.

მათი ინფორმაციით, კომისრის ანგარიში სამ ძირითად მიმართულებას მოიცავს: სამართალდამცავთა ანგარიშვალდებულებას, დემოკრატიული თავისუფლებების შეზღუდვას და ოკუპირებულ ტერიტორიებზე მცხოვრები თუ დევნილი პირების უფლებებს.

კომისარი მიესალმა შინაგან საქმეთა მინისტრის ინიციატივას პოლიციელებისთვის საიდენტიფიკაციო ნომრების ტარების შესახებ, თუმცა შეშფოთებას გამოხატავს იმის გამო, რომ 2024 და 2025 წლების საპროტესტო აქციების ძალადობრივი დაშლისთვის არცერთი სამართალდამცველი არ მიცემულა პასუხისგებაში. მან კიდევ ერთხელ მოითხოვა დამოუკიდებელი და საფუძვლიანი გამოძიება მომიტინგეების წინააღმდეგ ქიმიური ნივთიერებების შემცველი წყლის ჭავლის გამოყენების თაობაზე.

კომისარმა ხელისუფლებას მოუწოდა, იხელმძღვანელონ გაეროს 2020 წლის სახელმძღვანელო მითითებებით სასიკვდილო იარაღის არგამოყენების შესახებ და გაითვალისწინონ ადამიანის უფლებათა ევროპული სასამართლოს გადაწყვეტილებები, მათ შორის დიდ პალატაში განხილული საქმე "ცაავა და სხვები საქართველოს წინააღმდეგ".

ასევე, კომისარმა ხაზი გაუსვა რეპრესიული კანონების ერთობლივ უარყოფით გავლენას ქვეყანაში არსებულ გარემოზე. ევროკომისიის მიერ გავრცელებული ინფორმაციით, ახალი ცვლილებები, რომლებიც პოლიციას უფლებას აძლევს, თვითნებურად შეცვალოს აქციის ადგილი და დრო და კრძალავს ტროტუარის "ბლოკირებას", მნიშვნელოვნად ზღუდავს მშვიდობიანი შეკრების უფლებას.

ო'ფლაერტის შეშფოთება გამოიწვია ნიღბის ტარების, გზის გადაკეტვის ან კარვის დადგმისთვის 60-დღიანი პატიმრობის დაწესებამ, ასევე სისხლისსამართლებრივი პასუხისმგებლობის (2 წლამდე პატიმრობა) შემოღებამ ადმინისტრაციული დარღვევის განმეორების შემთხვევაში. ო'ფლაერტის შეფასებით, ეს ზომები შეუსაბამოა აუცილებლობისა და პროპორციულობის პრინციპებთან.

ევროკომისარმა პირდაპირ მოუწოდა ხელისუფლებას, გააუქმოს "უცხოური აგენტების რეგისტრაციის კანონი" და გადახედოს სხვა "რეპრესიულ კანონმდებლობას". კომისრის თქმით, ეს კანონები, ისევე როგორც მაუწყებლობის შესახებ კანონი (რომელიც კრძალავს მედიის უცხოურ დაფინანსებას), ეწინააღმდეგება ევროპულ კონვენციას და სამოქალაქო სექტორისა და მედიაში მსუსხავ ეფექტს ქმნის.

ო'ფლაერტიმ ხელისუფლებას მოუწოდა, რომ ათეულობით არასამთავრობო ორგანიზაციის წინააღმდეგ დაწყებული სისხლისა და ადმინისტრაციული სამართლის საქმეები (მათ შორის "საბოტაჟის" ბრალდება) მკაცრად შეესაბამებოდეს ადამიანის უფლებათა სტანდარტებს.

დევნილთა უფლებები და ოკუპირებული ტერიტორიები

გავრცელებულ ინფორმაციაში აღნიშნულია, რომ კომისარი ეწვია საოკუპაციო ხაზს ოძისში და შეხვდა დევნილებს წეროვანში. მან დადებითად შეაფასა სახელმწიფოს მხრიდან უფასო ჯანდაცვისა და განათლების მიწოდება, თუმცა აღნიშნა, რომ დევნილებს კვლავ აქვთ პრობლემები საცხოვრებლის, დასაქმებისა და განათლების კუთხით.

ო'ფლაერტიმ მხარდაჭერა გამოუცხადა დევნილთა უფლებას, ღირსეულად და უსაფრთხოდ დაუბრუნდნენ საკუთარ სახლებს და თავისუფლად გადაადგილდნენ საოკუპაციო ხაზზე.
ვიზიტის ფარგლებში კომისარი შეხვდა ირაკლი კობახიძეს, მთავრობის სხვა წევრებს, გენერალურ პროკურორს, სახალხო დამცველს და სამოქალაქო სექტორის წარმომადგენლებს.

როგორც გავრცელებულ ინფორმაციაშია აღნიშნული, კომისარი მაიკლ ო'ფლაერტი გეგმავს, მომავალშიც აქტიურად ადევნოს თვალი საქართველოში ამ მიმართულებებით განვითარებულ მოვლენებს.