დღეს, 21 ოქტომბერს თბილისის მერობის დამოუკიდებელმა კანდიდატმა, ალეკო ელისაშვილმა ბრიფინგზე თქვა, რომ ქართული ოცნების წარმომადგენლებს მხარდამჭერები ძალით მიჰყავთ საარჩევნო უბნებზე.

ელისაშვილის თქმით, უბნებზე სპეციალურად დაქირავებული ადამიანები სიებს ადგენენ და ამოწმებენ იქ მისულ ადამიანებს:

"ყველა საარჩევნო უბანთან არიან მობილიზებული შავებში ჩაცმული ადამიანები, აფორიაქებული სახეებით, საწერი კალმით, ფურცლებით, სიებით, დაარბენინებენ აქეთ-იქით საჯარო სამსახურში დასაქმებულ ადამიანებს. გაშმაგებული ეზიდებიან ხალხს კოორდინატორები, უზარმაზარი ადმინისტრაციული მანქანა არის დაქოქილი, რომ მხარდამჭერები ძალით მიიყვანონ საარჩევნო უბანზე. რა თქმა უნდა ამის ორგანიზატორი არის ხელისუფლება და რა თქმა უნდა ამის ორგანიზატორი არის ქართული ოცნება. ქართული ოცნების კანდიდატს გული უსკდება მეორე ტურის პერსპექტივაზე, იმ პერსპექტივაზე, რომელიც სავსებით რეალურია, ამ ყველაფრის წამალი არის ამომრჩევლების აქტივობა".

მმართველ პარტიაში, ქართულ ოცნებაში On.ge-ს უთხრეს, რომ მათ უპრეცენდენტოდ მაღალი მხარდაჭერა აქვთ და ამის გამო მათი აქტივობები გაცილებით თვალსაჩინოა. შეკითხვაზე, არიან თუ არა მათი კოორდინატორები და აგიტატორები საარჩევნო უბნებთან მობილიზებული, პარტიაში თქვეს, რომ ეს არის პარტიების ჩვეულებრივი საორგანიზაციო საქმიანობა.:

"გამომდინარე იქედან, რომ ქართულ ოცნებას აქვს უპრეცენდენტოდ მაღალი მხარდაჭერა, ჩვენი აქტივობა გაცილებით თვალსაჩინოა. რა თქმა უნდა, საკუთარი ამომრჩევლების მობილიზება და სიების შედგენა არავითარი დარღვევა არ არის. ქართული ოცნება მოუწოდებს მხარდამჭერებს, გამოცხადდნენ საარჩევნო უბნებთან, დააფიქსირონ საკუთარი პოზიცია და გახდნენ ქვეყნის განვითარების მონაწილეები".

დღეს რამდენჯერმე გავრცელდა ინფორმაცია, რომ ქართული ოცნების კოორდინატორები და აგიტატორები საარჩევნო უბნებთან ამომრჩევლის შესახებ ინფორმაციას ინიშნავენ.

მსგავსი ფაქტი On.ge-ს ჟურნალისტმაც დააფიქსირა. თბილისში, ვაშა ფშაველას გამზირზე, 64-ე სკოლის მიმდებარედ, სადაც ორი საარჩევნო უბანია განთავსებული, მოძრაობენ მოქალაქეები, რომლებიც უბანზე მისულ ამომრჩევლებს ესაუბრებიან და სიაში აღნიშვნებს აკეთებენ. იქვე დგას ამ პირების ავტომობილიც.