კრემლმა განაცხადა, რომ ინტერნეტზე დაწესებული შეზღუდვები, რომლებმაც, მათივე აღიარებით, ბევრ რუს მოქალაქეს შეფერხებები შეუქმნა, უსაფრთხოების მიზნით იყო აუცილებელი. თუმცა, მათივე მტკიცებით, ეს ზომები დროებითია და როგორც კი უსაფრთხოების გარემო ამის საშუალებას მისცემს, შეზღუდვები მოიხსნება. ინფორმაციას Reuters ავრცელებს.

ხელისუფლებამ მარტში მოსკოვში მობილური ინტერნეტი თითქმის სამი კვირით გათიშა. მსგავსი ზომები რეგულარულად რუსეთის სხვა რეგიონებშიც ტარდება. ოფიციალურ მიზეზად უკრაინული დრონების მხრიდან ინტერნეტის თავდასხმების სახელმძღვანელოდ გამოყენების რისკი სახელდება.

ამასთანავე, ხელისუფლებამ გააძლიერა კამპანია ისეთი მესენჯერების დასაბლოკად, როგორიცაა Telegram. ასევე იზღუდება ვირტუალური კერძო ქსელები (VPN), რომლებსაც მომხმარებლები ონლაინ ცენზურისთვის გვერდის ავლის მიზნით იყენებენ.

"არა, ეს არ არის უკან გადადგმული ნაბიჯი," — განაცხადა კრემლის პრესსპიკერმა, დიმიტრი პესკოვმა კითხვაზე, იყო თუ არა ეს რეგრესული ქმედებები.

"ჩვენ ახლა ისეთ ვითარებაში ვიმყოფებით, როდესაც უსაფრთხოების ასპექტები გარკვეული ზომების მიღების აუცილებლობას გვკარნახობს. ნათელია, რომ ინტერნეტზე წვდომის შეზღუდვა ბევრ მოქალაქეს დისკომფორტს უქმნის, მაგრამ ასეთია რეალობა, რომელშიც ამ მომენტში ვიმყოფებით. როგორც კი ამ ზომების საჭიროება გაქრება, ინტერნეტზე წვდომა, რა თქმა უნდა, სრულად აღდგება და ნორმალურ რეჟიმს დაუბრუნდება," — განუცხადა მან ჟურნალისტებს.