6 აპრილს ირანმა აშშ-ის 10-პუნქტიანი სამშვიდობო გეგმა შესთავაზა. ამის შესახებ ინფორმაციას ირანის სახელმწიფო მედიაზე დაყრდნობით The New York Times ავრცელებს. გეგმა პაკისტანის მეშვეობით გადაიცა, რომელიც კონფლიქტში მთავარი შუამავლის როლს ასრულებს.

The New York Times წერს, რომ ირანის ორმა მაღალჩინოსანმა, რომლებმაც სენსიტიურ მოლაპარაკებებზე საუბრისას ანონიმურობა ითხოვეს, განაცხადეს, რომ წინადადება ლიბანში "ჰეზბოლაზე" ისრაელის დარტყმების შეწყვეტასა, ყველა სანქციის მოხსნას და გარანტიას მოიცავს, რომ ირანზე თავდასხმა აღარ განმეორდება.

სანაცვლოდ, ირანი ჰორმუზის სრუტის საკვანძო საზღვაო მარშრუტის ბლოკადას მოხსნის და ასევე დააწესებს გადასახადს — დაახლოებით 2 მილიონ დოლარს თითოეულ გემზე, რომელსაც ომანთან გაიყოფს. გეგმის მიხედვით, ირანი ამ შემოსავლის თავის წილს ამერიკული და ისრაელის თავდასხმების შედეგად განადგურებული ინფრასტრუქტურის აღსადგენად გამოიყენებს.

ორშაბათს, ირანის ბოლო წინადადების შესახებ დასმულ კითხვაზე, ტრამპმა თქვა, რომ ეს საკმარისი არაა, თუმცა მნიშვნელოვანი ნაბიჯია.

"ეს მნიშვნელოვანი წინადადებაა. ეს მნიშვნელოვანი ნაბიჯია... ეს არ არის საკმარისი, მაგრამ ძალიან მნიშვნელოვანი ნაბიჯია", — განაცხადა ტრამპმა.

ორშაბათს, 6 აპრილს თეთრ სახლში გამართულ პრესკონფერენციაზე ტრამპმა კიდევ ერთხელ გაიმეორა მუქარა, რომ თუ მისი პირობები სამშაბათს, აღმოსავლეთის დროით საღამოს 8 საათამდე არ შესრულდება, ის ირანის მასშტაბით დამანგრეველი საჰაერო დარტყმების შესახებ ბრძანებას გასცემს.

"მათ აღდგენისთვის 100 წელი დასჭირდებათ", — თქვა მან.

ირანის სახელმწიფო მედიამ განაცხადა, რომ ირანული წინადადების ტექსტი "ცეცხლის შეწყვეტას უარყოფდა" და "ხაზს უსვამდა ომის მუდმივი დასრულების აუცილებლობას ირანის მოსაზრებების შესაბამისად".