ჰარი პოტერის მსახიობი პააპა ესიდუ ამბობს, რომ HBO Max-ის მომავალ ადაპტაციაში პროფესორი სნეიპის როლზე მისი დამტკიცების გამო, რასისტულ ნიადაგზე სიკვდილით დაემუქრნენ.

"მეუბნებოდნენ: 'წადი, თორემ მოგკლავ', — განუცხადა ესიდუმ ლონდონურ გამოცემა The Sunday Times-ს ახალ ინტერვიუში.

"ეს მართლაც მნიშვნელოვანია. რეალობა ისაა, რომ თუ ინსტაგრამს გადავხედავ, ვნახავ ვიღაცას, ვინც მწერს: 'შენს სახლთან მოვალ და მოგკლავ'. მართალია, თითქმის დარწმუნებული ვარ, რომ არ მომკლავენ... თუმცა, შეიძლება ეს სიტყვები მომავალში ცუდად შემომიბრუნდეს! მაგრამ, დიახ, მიუხედავად იმისა, რომ იმედი მაქვს, კარგად ვიქნები, არავინ უნდა აწყდებოდეს მსგავს რამეს საკუთარი საქმის კეთებისას. ბევრი ადამიანი სამუშაოს გამო სიცოცხლეს საფრთხეში იგდებს. მე კი ჰარი პოტერში ჯადოქარს ვთამაშობ. მოვიტყუები, თუ ვიტყვი, რომ ეს ჩემზე ემოციურად არ მოქმედებს".

მომავალ სტრიმინგ-ადაპტაციაში ესიდუ აპირებს შეასრულოს შხამ-წამლების მასწავლებლის, სნეიპის როლი. ეს პერსონაჟი მანამდე ალან რიკმანმა განასახიერა. მისმა ქასთინგმა ზოგი ფანის მხრიდან მწვავე რეაქცია გამოიწვია.

"თუმცა, შეურაცხყოფა სტიმულს მაძლევს", — განაგრძო მან ინტერვიუში — "და უფრო მეტ აზარტს მმატებს, რომ ეს პერსონაჟი ჩემებური გავხადო, რადგან მახსენდება, რას ვგრძნობდი ბავშვობაში. წარმოვიდგენდი ხოლმე ჩემს თავს ჰოგვორტსში, ცოცხზე ამხედრებულს. იდეა, რომ ჩემნაირმა ბავშვმა შეიძლება საკუთარი თავი დაინახოს ამ სამყაროში, სწორედ ეს არის მოტივაცია, რომ არ შემაშინოს იმ ადამიანის ნათქვამმა, რომელსაც ჩემი სიკვდილი ურჩევნია იმ საქმის კეთებას, რომლითაც ძალიან ვიამაყებ".

მსახიობმა, რომელიც მანამდე გამოჩნდა სერიალებში Black Mirror და I May Destroy You, აღიარა, რომ ორიგინალი ფილმები, რომლებშიც მთავარ როლებს დენიელ რედკლიფი, ემა უოტსონი და რუპერტ გრინტი ასრულებდნენ, არასდროს უნახავს, თუმცა ბავშვობაში ჯოან როულინგის წიგნების სერიის დიდი ფანი იყო. "ბავშვობაში გაუძღომელი მკითხველი ვიყავი", — თქვა მან — "დედაჩემს არ ჰქონდა საშუალება, რომ არდადეგებზე ძიძა აეყვანა, ამიტომ ბიბლიოთეკაში დავყავდი. ჰარი პოტერი ძალიან მიყვარდა. ფილმები არ მინახავს, მაგრამ წიგნები ჩემთვის რეალობიდან გაქცევის საშუალება იყო, როცა სხვა მხრივ ცხოვრება რთული მეჩვენებოდა".

ახალი სერიალის პრემიერა HBO Max-ზე 2027 წელს იგეგმება (თითქმის) სრულიად ახალი სამსახიობო შემადგენლობით. ცენტრალურ ტრიოს შეადგენენ დომინიკ მაკლაფლინი (ჰარი), არაბელა სტენტონი (ჰერმიონ გრეინჯერი) და ალასტერ სტაუტი (რონ უიზლი).

ესიდუმ სერიალში მონაწილეობის შესახებ ათწლიან კონტრაქტს მოაწერა ხელი და The Sunday Times-ს განუცხადა, რომ ეს "დიდი პასუხისმგებლობაა".

"დასრულებისას 45 წლის ვიქნები", — თქვა მან, — "და ვიცი, რომ ჩემი ცხოვრება რადიკალურად შეიცვლება, მაგრამ უბრალოდ უნდა მივენდო ამ პროცესს. შესაძლოა, ამ პროექტის დასრულების დროისთვის შვილებიც კი მყავდეს".

ასევე ნახეთ:

• "მუდმივად ჩვენზე ნუ ჰკითხავთ" — დენიელ რედკლიფი ახალი ჰარი პოტერის მსახიობებზე
• ჰარი პოტერის სერიალი წიგნს (ცოტათი) გადაუხვევს — რა გავიგეთ პირველ სეზონზე