ჩაკ ნორისის გარდაცვალების შესახებ ოჯახი ინსტაგრამზე წერს:

"დამძიმებული გულით გატყობინებთ, რომ გუშინ დილას ჩვენი საყვარელი ჩაკ ნორისი მოულოდნელად გარდაიცვალა. მიუხედავად იმისა, რომ გვსურს გარემოებები კონფიდენციალურად დავტოვოთ, იცოდეთ, რომ ის ოჯახის წევრების გარემოცვაში, მშვიდად იყო".

გარდაცვალებამდე ჩაკ ნორისი გადაუდებელი სამედიცინო მდგომარეობის გამო ჰავაიზე იყო ჰოსპიტალიზებული.

გავრცელებულ განცხადებაში ოჯახმა აღნიშნა, რომ ურჩევნიათ დეტალები კონფიდენციალურად დატოვონ, თუმცა ნორისის გარდაცვალება "მოულოდნელად" დაახასიათეს.

"ვიცით, ბევრს გსმენიათ მისი ბოლოდროინდელი ჰოსპიტალიზაციის შესახებ და მადლობას გიხდით იმ ლოცვისა და მხარდაჭერისთვის, რომელსაც მისკენ გზავნიდით", — წერს ოჯახი

ჩაკ ნორისი ამერიკული საბრძოლო ხელოვნების სცენის გამორჩეული ფიგურა და მძაფრსიუჟეტიან ფილმებში შესრულებული როლებით ცნობილი მსახიობი იყო.

იგი 1940 წელს ოკლაჰომაში დაიბადა. სანამ საბრძოლო ხელოვნების ვარსკვლავად იქცეოდა, აშშ-ის სამხედრო-საჰაერო ძალებში მსახურობდა. ნორისი ფლობდა შავ ქამრებს კარატეში, ტაეკვანდოში, ძიუდოსა და ბრაზილიურ ჯიუ-ჯიცუში.

ჩაკ ნორისი დეტექტივის როლში, 1988 წლის კრიმინალურ მძაფრსიუჟეტიან ფილმში გმირი და ტერორი

ფოტო: Getty Images

როგორც მსახიობმა, აღიარება 1972 წელს მოიპოვა, როდესაც საბრძოლო ხელოვნების ლეგენდა ბრიუს ლისთან ერთად გამოჩნდა ფილმში დრაკონის გზა. ნორისის სხვა ცნობილ ფილმებს შორისაა დელტას რაზმი (Delta Force) და დაკარგულები ბრძოლის ველზე (Missing in Action).

ჩაკ ნორისი ჯოზეფ ზიტოს 1984 წლის ფილმში დაკარგულები ბრძოლის ველზე.

ფოტო: Getty Images

კბილებამდე შეიარაღებული ჩაკ ნორისი 1985 წლის ფილმის, შეჭრა აშშ-ში (Invasion USA), ერთ-ერთ სცენაში

ფოტო: Getty Images

ჩაკ ნორისი დაუმორჩილებელი ტეხასელი რეინჯერის როლში, კადრი 1983 წლის ფილმიდან მარტოხელა მგელი მაკქუეიდი

ფოტო: Getty Images

თუმცა, ის ალბათ ყველაზე მეტად ცნობილია კორდელ "კორდ" უოკერის როლით გრძელვადიან სატელევიზიო სერიალში უოკერი, ტეხასელი რეინჯერი.

ბევრი ახალგაზრდისთვის მისი სახე უპირველესად 2010-იანი წლების დასაწყისის უკვდავ მიმებთან ასოცირდება. მის ფოტოებს ხშირად თან ახლდა თეთრი, სქელი შრიფტით დაწერილი ტექსტები, რომლებიც მსახიობს წარმოაჩენდა როგორც ლეგენდას, რომელთან გაჯიბრებაც შეუძლებელია.

ჩაკ ნორისი — მიმების ვარსკვლავი

ფოტო: Getty Images

აი, რამდენიმე მაგალითი:

  • "ჩაკ ნორისს შეუძლია მხედველობის ტესტი თვალდახუჭულმა გაიაროს";
  • "როდესაც ჰალკი ძალიან ბრაზდება, ის ჩაკ ნორისად იქცევა";
  • "გრიპს წელიწადში ერთხელ ჩაკ ნორისის საწინააღმდეგო აცრის გაკეთება უწევს";
  • "ჩაკ ნორისი შხაპს კი არ რთავს, მანამ აშტერდება, სანამ წყალი ტირილს არ დაიწყებს".

მას დარჩა მეუღლე, ჯინა ო’კელი და ხუთი შვილი.