საქართველოს ახალგაზრდა იურისტთა ასოციაციამ საკონსტიტუციო სასამართლოში, საქართველოს პარლამენტის წევრების კონსტიტუციურ სარჩელზე, სასამართლოს მეგობრის (Amicus Curiae) მოსაზრება წარადგინა. სარჩელით ნაციონალური მოძრაობის, კოალიცია ცვლილებისთვის და ძლიერი საქართველო — ლელოს აკრძალვაა მოთხოვნილი. საიას განმარტებით, პარტიის პასუხისმგებლობის საკითხის დაყენება მხოლოდ ცალკეული პირების ინდივიდუალური გამონათქვამების თუ ქმედებების გამო დაუშვებელია.

"საია მოსაზრებაში აფასებს გაერთიანების თავისუფლების შეზღუდვის უკიდურესი ფორმის შესახებ არსებულ საერთაშორისო სტანდარტებს და ეროვნულ საკანონმდებლო ჩარჩოს. სასამართლოსთვის მნიშვნელოვანია იმის გათვალისწინება, რომ პოლიტიკური პარტიების აკრძალვის საკითხის განხილვა მიმდინარეობს არსებითად მძიმე პოლიტიკური კონტექსტის პირობებში.

ადამიანის უფლებათა ევროპული სასამართლო მკაფიოდ მიუთითებს, რომ პოლიტიკური პარტიის აკრძალვა წარმოადგენს გაერთიანების თავისუფლების შეზღუდვის ყველაზე მკაცრ ფორმას და მისი გამოყენება დასაშვებია მხოლოდ უკიდურესი ზომის სახით, გამონაკლის შემთხვევებში. დაუშვებელია პარტიის პასუხისმგებლობის საკითხის დაყენება მხოლოდ ცალკეული პირების ინდივიდუალური გამონათქვამების თუ ქმედებების გამო", — დაწერა საიამ.

ცნობისთვის, საკონსტიტუციო სასამართლოს ვებგვერდზე ქართული ოცნების პარტიების აკრძალვის სარჩელი განათავსეს, რომელსაც მოსამართლე ვასილ როინიშვილი განიხილავს. სარჩელში 2003-2012 წელს გახმაურებული საქმეების ჩამონათვალია, მათ შორის "სერჟანტ როინ შავაძის მკვლელობის საქმე" — ვასილ როინიშვილი აღნიშნული საქმის ერთ-ერთი პროკურორი იყო.

საკონსტიტუციო სარჩელით ქართული ოცნება სამი პარტიის აკრძალვას მოითხოვს.

ესენია:

  • ერთიანობა — ნაციონალური მოძრაობა;

  • კოალიცია ცვლილებისთვის გვარამია, მელია, გირჩი, დროა;

  • ძლიერი საქართველო — ლელო, ხალხისთვის, თავისუფლებისთვის.