ევროსაბჭოს საპარლამენტო ასამბლეის (PACE) დელეგაცია თბილისში არასამთავრობო ორგანიზაციის წარმომადგენლებს და მედია მენეჯერებს შეხვდა. ამ წუთებში დელეგაცია ოპოზიციური პარტიების ერთიანი ნაციონალური მოძრაობის და კოალიცია ცვლილების წარმომადგენლებს ხვდება. PACE-ის დელეგაციის შემადგენლობაში არიან — ედიდ ესტრელა, საბინა კუდიჩი და ბას კლეინი.

არასამთავრობო ორგანიზაციების წარმომადგენლებმა ტვ პირველს განუცხადეს, რომ შეხვედრაზე დელეგაციას უკანონო დაკავებებზე, პოლიტიკურად მოტივირებულ სისხლის სამართლის საქმეებზე და ოპოზიციური პარტიების აკრძალვაზე მიაწოდეს ინფორმაცია. შეხვედრებზე დიდი ყურადღება დაეთმო საქართველოში მედიის რთულ მდგომარეობას.

"ყველაზე უპრეცედენტო გაუარესება აქვს ამ ეტაპზე ევროსაბჭოს მასშტაბით ადამიანის უფლებების კუთხით. ჩამოვიდნენ საქართველოში, რათა პირდაპირ მიიღონ ინფორმაცია უფლება დარღვევების შესახებ, შეხვდნენ უშუალოდ იმ პირებს, რომლებსაც უფლებები დაერღვათ, შეხვდნენ მედიის წარმომადგენლებს, არასამთავრობო ორგანიზაციების წარმომადგენლებს. ჩვენს მიერ იქნა მსჯელობა იმ საკითხების გარშემო, რაც ჩვენი შესწავლის საგანია. ეს არის, მაგალითად, სასამართლოში არსებული მდგომარეობა, არასამთავრობოებთან მიმართებით მიღებული კანონმდებლობა, ეს არის პოლიტპატიმრებთან დაკავშირებით მიღებული რეგულაციები, მედიასთან დაკავშირებული საკითხები, ყველა ის საკითხი, რომელიც ქართული დემოკრატიის უკუსვლას იწვევს. ეს ინფორმაციები მათ ჰქონდათ, ჩვენ სხვადასხვა დამატებითი ინფორმაციები მივაწოდეთ, რომელიც არსებულ რეალობაში მათთვის მნიშვნელოვანია, რომ იცოდნენ," — განაცხადა სპს სახალხო დამცველის ყოფილი მოადგილემ, გიორგი ბურჯანაძემ.

სამართლიანი არჩევნების (ISFED) დირექტორმა, ლევან ნატროშვილმა შეხვედრის შემდეგ განაცხადა, რომ შეხვედრაზე ქვეყანაში ადამიანის უფლებათა მდგომარეობების მძიმე მდგომარეობაზე ისაუბრეს. ნატროშვილის განცხადებით, დელეგაციის წევრებს ასევე აინტერესებდათ, თუ რა მდგომარეობაა ადამიანის უფლებათა დაცვის კუთხით სამოქალაქო სექტორში.

"ეს არის რეგულარული ვიზიტი, რომელსაც პერიოდულად ახორციელებენ ხოლმე საქართველოში. აინტერესებთ ადამიანის უფლებათა მდგომარეობა. შეხვედრა სწორედ ამას ეძღვნება. აინტერესებთ, რა მდგომარეობაა სხვადასხვა მიმართულებით, სამოქალაქო სექტორში, ადამიანის უფლებათა დაცვის კუთხით, მედიაში და ა.შ. კითხვები იყო სამოქალაქო ორგანიზაციების მდგომარეობაზე — თუ როგორ ვახერხებთ სამუშაოს გაგრძელებას, რა მდგომარეობაა სექტორში, რა შეზღუდვებია ქვეყანაში. ის მძიმე სიტუაცია აღვუწერეთ, რაც ხდება ქვეყანაში," — განაცხადა ნატროშვილმა.

მოგვიანებით ევროსაბჭოს საპარლამენტო ასამბლეის დელეგაციის წევრები სხვა ოპოზიციური პარტიების წარმომადგენლებს შეხვდებიან.

ოცნების პარლამენტის ევროპასთან ინტეგრაციის კომიტეტის თავმჯდომარის, ლევან მახაშვილის ინფორმაციით, ხვალ PACE-ის დელეგაცია ოცნების პარლამენტის თავმჯდომარეს, შალვა პაპუაშვილსაც შეხვდება.