აზერბაიჯანის თავდაცვის სამინისტრო, სახელმწიფო სასაზღვრო სამსახური, შინაგან საქმეთა და საგანგებო სიტუაციების სამინისტროები "სრულ საბრძოლო მზადყოფნაში" გადავიდნენ. გავრცელებული ინფორმაციით, სამხედრო მოსამსახურეების შვებულებები გაუქმდა, ხოლო ირანის საზღვარზე დრონებისა და დაბალ სიმაღლეზე მფრინავი ობიექტების საწინააღმდეგო სისტემები განლაგდა. თავდაცვის სამინისტროს ოფიციალური კომენტარი არ გაუკეთებია. ინფორმაციას OC media ავრცელებს.

ოპოზიციონერმა პოლიტიკოსმა იადიგარ სადიგლიმ ამ ზომებს "აბსოლუტურად ბუნებრივი" უწოდა და განაცხადა, რომ ბევრი რამ შეიძლება მოხდეს.

"სახელმწიფოს მეთაურმა, რა თქმა უნდა, უნდა მიიღოს გარკვეული სიფრთხილის ზომები, გადადგას გარკვეული ნაბიჯები და თუ მათ ეს გააკეთეს, ვფიქრობ, ეს ნორმალურია. ბევრი რამ შეიძლება მოხდეს. ხვალ შეიძლება ქაოსი წარმოიქმნას, რომელიმე სამხედრო შენაერთის მეთაურმა შეიძლება დამოუკიდებლად იმოქმედოს", — განაცხადა მან.

მიუხედავად იმისა, რომ ზოგიერთმა ექსპერტმა ამ ინფორმაციის გასაჯაროება სახელმწიფო უსაფრთხოების მოტივით გააკრიტიკა, სხვებმა ამას მხარი დაუჭირეს და მიუთითეს ირანის საზღვართან მდებარე აზერბაიჯანის რაიონებში სროლის ბოლოდროინდელ შემთხვევებზე.

უფლებადამცველმა ჰილალ მამედოვმა ვარაუდი გამოთქვა, რომ ჯარების მობილიზება "შესაძლოა ლტოლვილთა ნაკადის აღსაკვეთად იყოს"

"თუ ირანის წინააღმდეგ სახმელეთო ჯარები განლაგდება, აშკარაა, რომ ეს კიდევ უფრო საშინელ შედეგებს გამოიწვევს: უდავოა, რომ ამ ბრძოლას არა მხოლოდ მილიონობით ადამიანი შეუერთდება, არამედ ათობით ათასი ბავშვი და ქალი იძულებული გახდება თავშესაფარი მეზობელ ქვეყნებში, მათ შორის ჩვენთანაც ეძებოს. უდავოდ, ამ შემთხვევაში ჩვენ ასევე მოგვიწევს ირანელი ხალხისთვის ყოველმხრივი დახმარების აღმოჩენა", — განაცხადა მან.

ასევე, შეგახსენებთ, რომ დღეს, 5 მარტს აზერბაიჯანში, ნახიჩევანის აეროპორტის ტერიტორიაზე ირანის უპილოტო საფრენი აპარატები ჩამოვარდა და აფეთქდა — ინფორმაცია Reuters-ს აზერბაიჯანის მთავრობასთან დაახლოებულმა წყარომ დაუდასტურა.

აზერბაიჯანული პროსამთავრობო სააგენტო APA News Agency-ს ცნობით, თავდასხმის შედეგად 2 ადამიანი დაშავდა. ერთი დრონი ნახიჩევანის აეროპორტის ტერიტორიაზე ჩამოვარდა, მეორე — სკოლის შენობასთან ახლოს. მოგვიანებით მათ აეროპორტში გადაღებული კადრებიც გამოაქვეყნა, სადაც ჩანს, რომ შენობის ჭერი დაზიანებულია და ადამიანები ტერიტორიას ტოვებენ.

აზერბაიჯანში ირანის ელჩი ოფიციალური საპროტესტო ნოტის გადასაცემად საგარეო საქმეთა სამინისტროში დაიბარეს.