აშშ-ის სენატში ჩავარდა რეზოლუცია, რომელიც ირანთან ომში პრეზიდენტ ტრამპის უფლებამოსილების შეზღუდვას ისახავდა მიზნად. დოკუმენტი კონგრესის თანხმობას სამხედრო მოქმედებების გასაგრძელებლად მოითხოვდა. ინფორმაციას BBC ავრცელებს.

დემოკრატები ამტკიცებენ, რომ ტრამპმა კონგრესს გვერდი აუარა და ომის დაწყების მიზეზებს ცვლის. რესპუბლიკელთა უმეტესობამ რეზოლუცია დაბლოკა, თუმცა ზოგიერთმა მათგანმა აღნიშნა, რომ შესაძლოა კურსი შეცვალონ, თუკი ომი მომდევნო კვირებში გაფართოვდება.

ვითარების დეესკალაციის მკაფიო გზის არარსებობის ფონზე, თავდაცვის მდივანმა პიტ ჰეგსეტმა განაცხადა, რომ ომი შესაძლოა რვა კვირას გაგრძელდეს — რაც თითქმის ორჯერ აღემატება ტრამპის მიერ უქმეებზე დასახელებულ ხანგრძლივობას.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა. დონალდ ტრამპმა ისლამური რესპუბლიკის ბირთვული პროგრამის განადგურების განზრახვის შესახებ გამოაცხადა. თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.