აზერბაიჯანში, ნახიჩევანის აეროპორტის ტერიტორიაზე ირანის უპილოტო საფრენი აპარატები ჩამოვარდა და აფეთქდა — ინფორმაცია Reuters-ს აზერბაიჯანის მთავრობასთან დაახლოებულმა წყარომ დაუდასტურა.

აზერბაიჯანული პროსამთავრობო სააგენტო APA News Agency-ს ცნობით, თავდასხმის შედეგად 2 ადამიანი დაშავდა. ერთი დრონი ნახიჩევანის აეროპორტის ტერიტორიაზე ჩამოვარდა, მეორე — სკოლის შენობასთან ახლოს. მოგვიანებით მათ აეროპორტში გადაღებული კადრებიც გამოაქვეყნა, სადაც ჩანს, რომ შენობის ჭერი დაზიანებულია და ადამიანები ტერიტორიას ტოვებენ.

აზერბაიჯანში ირანის ელჩი ოფიციალური საპროტესტო ნოტის გადასაცემად საგარეო საქმეთა სამინისტროში დაიბარეს.

"აზერბაიჯანის ტერიტორიაზე განხორციელებული ეს თავდასხმა ეწინააღმდეგება საერთაშორისო სამართლის ნორმებსა და პრინციპებს და ხელს უწყობს რეგიონში დაძაბულობის ზრდას.

ჩვენ მოვითხოვთ, რომ ირანის ისლამურმა რესპუბლიკამ უმოკლეს ვადაში განმარტოს მომხდარი, წარმოადგინოს ახსნა-განმარტება და მიიღოს აუცილებელი გადაუდებელი ზომები, რათა მსგავსი ინციდენტები მომავალში აღარ განმეორდეს," — ნათქვამია აზერბაიჯანის საგარეო საქმეთა სამინისტროს განცხადებაში.