რუსეთის უკრაინაში შეჭრიდან ოთხი წლისთავს ევროკომისია სოციალურ ქსელში გამოეხმაურა. მათ მიერ გავრცელებულ განცხადებაში წერია, რომ მათ შტაბ-ბინაზე უკრაინის ფერები უკრაინელი ხალხის სიმამაცისა და გამძლეობის შეხსენებაა. მათივე განმარტებით, ეს სამართლიანი და მდგრადი მშვიდობის მისაღწევად ძალისხმევის გაორმაგების მოწოდებაა.

"უკრაინის ბრძოლა ჩვენი ბრძოლაა.

ამაღამ, ომის ოთხი წლისთავზე, ჩვენს შტაბ-ბინაზე უკრაინის ფერები უკრაინელი ხალხის სიმამაცისა და გამძლეობის შეხსენებაა.

ეს არა მხოლოდ სოლიდარობის სიმბოლოა, არამედ პატივისცემის გამოხატულება მათთვის, ვინც სიცოცხლე დაკარგა და მოწოდება, გავაორმაგოთ ჩვენი ძალისხმევა სამართლიანი და მდგრადი მშვიდობის მისაღწევად.

ევროპის საერთო ღირებულებები, ძალა და ერთგულება არასოდეს შეირყევა.

ჩვენ ვდგავართ უკრაინის გვერდით", — დაწერა ევროკომისიამ.

შეგახსენებთ, რუსეთი უკრაინაში 2022 წლის 24 თებერვალს შეიჭრა. ამ დღეს რუსეთის პრეზიდენტმა, ვლადიმერ პუტინმა უკრაინის "დემილიტარიზაციასა და დენაციფიკაციისთვის" "სპეციალური სამხედრო ოპერაციის" დაწყება გამოაცხადა და რამდენიმე წუთში, უკრაინის ყველა რეგიონში საჰაერო და სარაკეტო იერიშები დაიწყო.

მანამდე, 2014 წელს რუსეთი ყირიმში შეიჭრა და მიიერთა ის, ასევე რუსეთის მიერ მხარდაჭერილმა სეპარატისტებმა დაიკავეს დონბასის ნაწილი სამხრეთ-აღმოსავლეთ უკრაინაში, კერძოდ ლუჰანსკისა და დონეცკის ოლქები.