თამარ ბაჩალიაშვილის ოჯახმა საქმის გამოძიების განახლების მოთხოვნით პროკურატურას მიმართა. ისინი დღემდე არ ეთანხმებიან გამოძიების ვერსიას, რომ ბაჩალიაშვილმა სიცოცხლე თვითმკვლელობით დაასრულა.

"საჩივარი შევიტანეთ. როგორც მოგეხსენებათ, შოთაძემ ყველაფერი გააყალბა და ყველაფერი გააკეთა იმისთვის, რომ საქმე არ გახსნილიყო. ვითხოვთ, რომ გასაჯაროვდეს ყველა ის ჩანაწერი და დამტკიცდეს, რაც მოხდა სინამდვილეში. სულ ვამბობდი, მაშინ ქოლ-ცენტრების თემა ახალი ხილი იყო, მაგრამ სულ ვამბობდი, რომ ლილუაშვილი არის ამ საქმეში ჩართული და სასაცილოდ არ ჰყოფნიდათ. როგორც აღმოჩნდა, თურმე სათავეში ყოფილა და თვითონ ჰქონია ის ქოლ-ცენტრები. ზის ციხეში და იმის მოლოდინიც მაქვს, რომ დაუმძიმდეს სასჯელი, თუკი რამით აქვს წვლილი მიღებული თამუნას ამბავში," — განაცხადა ბაჩალიაშვილის დედამ, თეონა თამაზაშვილმა "ფორმულას" ეთერში.

შეგახსენებთ, 2020 წლის 18 ივლისს, 23 წლის პროგრამისტი თამარ ბაჩალიაშვილი დაიკარგა. 5-დღიანი ძებნის შემდეგ, ბაჩიაშვილი თეთრიწყაროს ტყეში, მანქანაში გარდაცვლილი იპოვეს. ახალგაზრდა ქალის გარდაცვალებაზე გამოძიება თავდაპირველად თავისუფლების უკანონოდ აღკვეთის კვალიფიკაციით მიმდინარეობდა. 24 ივლისს საქმეს თვითმკვლელობამდე მიყვანის მუხლიც დაემატა. საბოლოოდ, პროკურატურამ საქმე გახსნილად გამოაცხადა — მათი ვერსიით, ბაჩიაშვილი მედიკამენტოზური ინტოქსიკაციით გარდაიცვალა.

გარდაცვლილი ქალის ოჯახის ვერსიით, ბაჩალიაშვილი, სავარაუდოდ, ე.წ ქოლ-ცენტრში მუშაობდა და მისი გარდაცვალებაც მის სამსახურებრივ საქმიანობას უკავშირდებოდა.

23 დეკემბერს, ყოფილი სუს-ის უფროსი, გრიგოლ ლილუაშვილი განსაკუთრებით დიდი ოდენობით ქრთამის აღების 4 ეპიზოდის ბრალდებით დააკავეს. გამოძიების ვერსიით, 2021-2023 წლებში გრიგოლ ლილუაშვილი მისი ნათესავის, სანდრო ლილუაშვილის დახმარებით თაღლითურ ქოლ-ცენტრებს მფარველობდა — აღნიშნული საქმიანობით ყოფილმა მაღალჩინოსანმა ქრთამის სახით $1, 3 მლნ მიიღო.

მეტი თამარ ბაჩალიაშვილის საქმეზე: