ჩარლის ძალიან მალე ახალი ანგელოზები ეყოლება, რადგან ფილმის ახალ ნაწილზე მუშაობა აქტიურად მიმდინარეობს.

The Hollywood Reporter-ის ცნობით, ფილმს Sony Pictures გადაიღებს, ხოლო სცენარზე Crazy Rich Asians-ის სცენარისტი, პიტ ჩიარელი, იმუშავებს. ამასთანავე, წყარო იუწყება, რომ ფილმის გადაღებაში მონაწილეობას მიიღებს დრიუ ბერიმორი და მისი კომპანია — Flower Films.

ჩარლის ანგელოზების თავდაპირველად სერიალის სახით ვიხილეთ, რომელიც ABC-ზე 1976 წლიდან 1981 წლამდე გადიოდა. კეით ჯექსონის, ჟაკლინ სმიტისა და ფარა ფოსეტის მონაწილეობით გადაღებული სერიალი მალევე პოპკულტურის სენსაციად იქცა.

ჩარლის ანგელოზები 1976-1981

ჩარლის ანგელოზები 1976-1981

ფოტო: ABC News

რამდენიმე ათწლეულის შემდეგ, Sony Columbia-მ ჩარლის ანგელოზებს დღის სინათლე კიდევ ერთხელ დაანახა და ახალი ფილმი გამოუშვა, რომელშიც კამერონ დიასი, ლუსი ლუ და დრიუ ბერიმორი მონაწილეობდნენ. ამ უკანასკნელს გულშემატკივრების დიდი სიყვარული და ფინანსური წარმატება ხვდა წილად, ფილმმა კინოგაქირავებას $250 მილიონი დოლარი მოუტანა.

ჩარლის ანგელოზები 2019

ჩარლის ანგელოზები 2019

ფოტო: Netflix

ჩარლის ანგელოზები 2000-2003

ჩარლის ანგელოზები 2000-2003

ფოტო: Sony

სამწუხაროდ, მაყურებლის სიყვარული ვერ დაიმსახურა ჩარლის ანგელოზების 2019 წლის ვერსიამ, რომელშიც მთავარი როლები კრისტენ სტიუარტმა, ნაომი სკოტმა და ელა ბალინსკამ შეასრულეს. ფილმმა ჯამში $73 მილიონი დოლარი გამოიმუშავა.

ვინ გახდება ჩარლის ახალი ანგელოზი?

ჯერჯერობით უცნობია, რომელი მსახიობები შეიძლება ვიხილოთ ამ ლეგენდარულ როლებში და შესაძლებელია თუ არა ძველი მსახიობების ხელახალი გამოჩენა. ფანები ვარაუდობენ, რომ ფილმში ვერ ვნახავთ ჩარლის ანგელოზების 2019 წელს გამოსულ ფილმში მონაწილე მსახიობებს. აღსანიშნავია, რომ ფილმში დაბრუნება არც კრისტენ სტიუარტს სურს.

კრისტენ სტიუარტი BAFTAS-ზე

ფოტო: Getty Images

მსახიობმა ერთ-ერთ ინტერვიუში აღნიშნა, რომ ელიზაბეტ ბენკსის ფილმის გადაღებები "სძულდა".

"თავიდან ეს კარგი იდეა ჩანდა, თუმცა ფილმის გადაღებები მძულდა. არ ვიცი, კიდევ რა ვთქვა", — ამბობს მსახიობი — "სიმართლე გითხრათ...მაგ სამს (ლუსი ლუ, დრიუ ბერიმორი, კამერონ დიასი) ვერავინ შეედრება. ძალიან მიყვარს ორიგინალი ფილმი, ეს თუ რამეს გეუბნებათ".

ჯერჯერობით უცნობია, როდის ვიხილავთ ფილმის ახალ ვერსიას.