გაერთიანებული სამეფოს პარლამენტის კონსერვატორმა დეპუტატმა, სერ იაინ დანკან სმითმა გაერთიანებული სამეფოს სახელმწიფო მინისტრ სტივენ დაუთს ბიძინა ივანიშვილის სანქცირებასთან დაკავშირებით კითხვით მიმართა.

სერ იაინ დანკან სმითმა სტივენ დაუთს ჰკითხა, (1.) გააკეთა თუ არა მისმა დეპარტამენტმა შეფასება იმ მტკიცებულებების ეფექტიანობაზე, რომლებიც აშშ-მ გამოიყენა ბიძინა ივანიშვილის სანქცირებისას; და ასევე, (2.) გააკეთა თუ არა შეფასება იმ შესაძლო უპირატესობების შესახებ, რომლებიც უკავშირდება სანქციების დაწესებას იმ პირების მიმართ, რომლებიც დაკავშირებულნი არიან საქართველოში სამოქალაქო საზოგადოების რეპრესიასთან, დამოუკიდებელი მედიის შევიწროებასთან და პოლიტიკური დევნის პრაქტიკასთან.

სტივენ დაუთის განმარტებით, გაერთიანებული სამეფო მტკიცედ უჭერს მხარს საქართველოში სამოქალაქო საზოგადოებას, დამოუკიდებელ მედიასა და ყურადღებით აკვირდებიან მოვლენებს და საერთაშორისო პარტნიორებთან თანამშრომლობენ. მისივე თქმით, სამომავლო შესაძლო სანქციების დაწესებაზე კომენტარს ვერ გააკეთებს, რადგან ამან შეიძლება მათი ეფექტიანობა დააზიანოს.

"გაერთიანებული სამეფო მტკიცედ უჭერს მხარს საქართველოში სამოქალაქო საზოგადოებას, დამოუკიდებელ მედიასა და დემოკრატიულ თავისუფლებებს. ბოლო წლებში საქართველოს მთავრობის მიერ მიღებული კანონმდებლობა სულ უფრო მეტად იღებს მიზანში არასამთავრობო ორგანიზაციებს, ოპოზიციის ლიდერებსა და დამოუკიდებელ ხმებს. ჩვენ ყურადღებით ვაკვირდებით მოვლენებს და ვთანამშრომლობთ საერთაშორისო პარტნიორებთან.

გაერთიანებულმა სამეფომ უკვე დააწესა მიზნობრივი სანქციები შს სამინისტროს მაღალჩინოსნებზე, რომლებიც პასუხისმგებლები იყვნენ მომიტინგეებზე ძალადობრივ თავდასხმებზე, მოსამართლეებზე, რომლებმაც თავიანთი უფლებამოსილება ბოროტად გამოიყენეს, და მაღალი რანგის ოფიციალურ პირებზე, რომლებიც ხელს უწყობდნენ სერიოზულ ადამიანის უფლებათა დარღვევებს.

მე ვერ გავაკეთებ კომენტარს მომავალში შესაძლო სანქციების დაწესებაზე, რადგან ამან შეიძლება მათი ეფექტიანობა დააზიანოს", — აღნიშნულია პასუხში.