საქართველო-ამერიკის ურთიერთობების "გადატვირთვა" დამოკიდებულია ამერიკულ მხარეზე. ოპტიმისტურად ვართ განწყობილი — ამის შესახებ ოცნების პრემიერმინისტრმა, ირაკლი კობახიძემ ჟურნალისტებთან საუბრისას განაცხადა. მისი თქმით, მათი მხრიდან სრული ღიაობაა და ამერიკის მხრიდან ბოლოდროინდელი გზავნილები მათ ოპტიმისტურად განაწყობთ.

"არსებითად არის ეს [საქართველო-ამერიკის ურთიერთობების "გადატვირთვა"] დამოკიდებული ამერიკულ მხარეზე. ჩვენი მხრიდან ხელი არის გაწვდილი. ჩვენი სრული ღიაობა არის გამოხატული ურთიერთობების გადატვირთვასთან დაკავშირებით, სტრატეგიული პარტნიორობის აღდგენასთან დაკავშირებით და ოპტიმისტურად ვართ განწყობილი, რა თქმა უნდა. ბოლოდროინდელი გზავნილები, რაც ისმის ამერიკული მხრიდან, განგვაწყობს ჩვენ ოპტიმისტურად. დაველოდოთ მოვლენების განვითარებას. ჩვენი სურვილია, აღდგეს სტრატეგიული პარტნიორობა — დაველოდებით ამერიკული მხარის ნაბიჯებს ამ მიმართულებით", — განაცხადა ირაკლი კობახიძემ.

საქართველო-ამერიკის ურთიერთობებზე საუბრისას კობახიძემ ასევე აღნიშნა, რომ ისინი აშშ-ის პოზიციას იმდენ ხანს დაელოდებიან რამდენიც საჭირო იქნება და მოთმინება "არასდროს" ამოეწურებათ. მისივე განმარტებით, მზად არიან"ყოველგვარი წინასწარი პირობების გარეშე განვიხილოთ ყველა დეტალი და კონკრეტული გზამკვლევით, სადაც ასახული იქნება ორივე მხარის ინტერესები, სუფთა ფურცლიდან განვაახლოთ სტრატეგიული პარტნიორობა."

"რამდენი ხანიც იქნება საჭირო, იმდენი ხანი დაველოდებით... ჩვენ ველოდებით აშშ-ის პოზიციას რამდენი ხანიც იქნება საჭირო... ჩვენ ველოდებით ამერიკის შეერთებული შტატების შემხვედრ პოზიციას. ვნახოთ, მოთმინებით დაველოდებით მომავალშიც. იმედი გვაქვს რომ სტრატეგიული პარტნიორობა განახლდება ამერიკის შეერთებულ შტატებსა და საქართველოს შორის...
მე არაფერს არ ვამტკიცებ, მე გითხარით, რომ მოთმინებით ველოდები შეერთებული შტატების პოზიციას.

[ჟურნალისტი: მოთმინება როდის ამოგეწურებათ?]

არასოდეს.

ჩვენ მთავარი ნაბიჯი გვაქვს გადადგმული — ღიად გამოვხატეთ ჩვენი პოზიცია სტრატეგიული პარტნიორობის განახლებასთან დაკავშირებით. ვთქვით, რომ მზად ვართ ყოველგვარი წინასწარი პირობების გარეშე განვიხილოთ ყველა დეტალი და კონკრეტული გზამკვლევით, სადაც ასახული იქნება ორივე მხარის ინტერესები, სუფთა ფურცლიდან განვაახლოთ სტრატეგიული პარტნიორობა. ეს არის ჩვენი პოზიცია... პრეზიდენტმა და საგარეო საქმეთა მინისტრმა საჯაროდ ისაუბრეს იმ გზავნილებთან დაკავშირებით, რაც მოისმინეს და ეს გზავნილები. ჩვენ გვიმყარებს ოპტიმიზმს. დანარჩენი ვნახოთ. მოთმინებით დაველოდებით ამერიკის შეერთებული შტატების პოზიციას", — განაცხადა ოცნების პრემიერმა.