უკრაინის პრეზიდენტის, ვოლოდიმირ ზელენსკის განცხადებით, უკრაინაში 157 სამხედრო ტყვე დააბრუნეს. ტყვეებს შორის მშვიდობიანი მოქალაქეებიც არიან და მათი უმეტესობა ტყვეობაში 2022 წლიდან იმყოფებოდა.

"ჩვენს ხალხს, 157 უკრაინელს სახლში ვაბრუნებ — სამხედროებს შეიარაღებული ძალებიდან, ეროვნული გვარდიიდან და სახელმწიფო სასაზღვრო სამსახურიდგან, რიგითებს, სერჟანტებსა და ოფიცრებს. ჩვენს დამცველებთან ერთად სახლში ბრუნდებიან მშვიდობიანი მოქალაქეებიც. მათი უმეტესობა ტყვეობაში 2022 წლიდან იმყოფებოდა.

დღევანდელი გაცვლა ხანგრძლივი პაუზის შემდეგ შედგა და კრიტიკულად მნიშვნელოვანი იყო, რომ ეს შევძელით. მადლობას ვუხდი ყველას, ვინც ამ გაცვლების განხორციელებაზე მუშაობს, ასევე ყველას ფრონტის ხაზზე, ვინც უკრაინის გაცვლის ფონდის გაფართოებას უწყობს ხელს. ჩვენი მებრძოლების სიმტკიცის გარეშე ასეთი გაცვლები შეუძლებელი იქნებოდა. სწორედ ამიტომ ჩვენი დანაყოფების მიერ მიღწეული ყოველი შედეგი ასევე უზრუნველყოფს უკრაინელების რუსეთის ტყვეობიდან დაბრუნების შესაძლებლობას.

ჩვენი ხალხის ტყვეობიდან დასახსნელად მუშაობას გავაგრძელებთ. ყველა უნდა დავაბრუნოთ — და ეს ნამდვილად მოხდება. თითოეულ მათგანზე ვმუშაობთ, რათა თითოეულ ოჯახს საბოლოოდ შეეძლოს საკუთარი საყვარელი ადამიანის სახლში დაბრუნება," — წერს ზელენსკი X-ზე.

აბუ-დაბიში ორდღიანი მოლაპარაკების შედეგად, უკრაინამ და რუსეთმა 314 სამხედრო ტყვე გაცვალეს, აქედან 157 უკრაინელი იყო, დანარჩენი — რუსი. მოლაპარაკებას ამერიკის მხარეც ესწრებოდა.