"ჩვენ არ ვართ კლასში და ჯგუფელები არ არიან არც შვედეთი, არც დანია, არც გერმანია, არც საფრანგეთი და არც არავინ — შვედეთი ცდილობს ჩვენს მენტორობას, ცხვირაწეული გვესაუბრება და რაღაც მიმართებებით ჭკუას გვასწავლის", — ამის შესახებ ბრიფინგზე ოცნების პარლამენტის თავმჯდომარემ, შალვა პაპუაშვილმა განაცხადა ჟურნალისტის კითხვის საპასუხოდ, ირაკლი კირცხალიას მსგავსად, ისიც შეშფოთებულია თუ არა შვედეთში არსებული მდგომარეობით?

• "დროს ნუ დახარჯავთ საქართველოში არარსებულ პრობლემებზე შფოთვაში და თქვენი სახელმწიფოს გამოწვევებზე იზრუნეთ" — ირაკლი კირცხალია შვედეთს

შალვა პაპუაშვილის თქმით, ვერ გაიგო "რატომ უნდა ვასწავლებინოთ ჭკუა სხვებს და რატომ არ უნდა მივუთითოთ სხვებს იმ ხარვეზებზე, რომლებიც მათ ქვეყნებში არის?!"

"ჩვენ არ ვართ კლასში და ჯგუფელები არ არიან არც შვედეთი, არც დანია, არც გერმანია, არც საფრანგეთი და არც არავინ — შვედეთი ცდილობს ჩვენს მენტორობას, ცხვირაწეული გვესაუბრება და რაღაც მიმართებებით ჭკუას გვასწავლის. საქართველო არის 3000-წლოვანი სახელმწიფოებრიობის მქონე ქვეყანა, რომელსაც დემოკრატიის ასწლოვანი გამოცდილება აქვს და იყო ერთ-ერთი პირველი ევროპული დემოკრატია, სადაც არჩევითობის პრინციპი დამკვიდრდა. ვერ გავიგე რატომ უნდა ვასწავლებინოთ ჭკუა სხვებს და რატომ არ უნდა მივუთითოთ სხვებს იმ ხარვეზებზე, რომლებიც მათ ქვეყნებში არის?! ამიტომ, რა თქმა უნდა, ჩვენ ყველას მივუთითებთ იმ ხარვეზებზე და მოვითხოვთ კიდეც. რა რეაგირება იქნება ამაზე ძალიან გვაინტერესებს. ან ჩვენ ავყვებით იმ მცირე უსამშობლოების ჯგუფს, რომლებიც ამბობენ, რომ ჩვენ უნდა ვიყოთ საკავშირო რესპუბლიკის დონეზე, როგორც საბჭოთა კავშირში ვიყავით. საბჭოთა მოსკოვიდან რომ ჭკუას გვასწავლიდნენ და რევიზორები რომ ჩამოდიოდნენ და მეორე მდივნებს გვინიშნავდნენ — ან ასე წარმოგვიდგენია ჩვენ ევროკავშირი — როგორც კავშირი არათანაბრებისა, ან ჩვენ ვიქცევით როგორც დამოუკიდებელი, სუვერენული სახელმწიფო, რომელიც უპირველეს ყოვლისა, ითხოვს, პატივი სცენ მის სახელმწიფოებრიობას.

ამიტომ, რა თქმა უნდა, შეშფოთებული ვართ არა მხოლოდ შვედეთის მიმართ არამედ, სხვების მიმართ. ბერლინში როგორ ხდება აქციების დაშლა დემონსტრაციების, ხომ გაქვთ ნანახი? ის ბრუტალური ძალადობა, რომელსაც ჩვენ პოლიციის მხრიდან ვხედავთ პირდაპირ ეთერში, როდესაც ბერლინში თუ სხვა დედაქალაქებში ხდება ძალადობა დემონსტრანტების მიმართ — ამაზე არ ვთქვათ არაფერი. არ ვთქვათ არაფერი იმაზე, რაც თუნდაც გრენლანდიაში დანიამ მათ შორის ევროკავშირის წევრობის დროსაც კი მიდიოდა ის სტერილიზაციის პროცესი, რომელიც შეფასებულია, როგორც ფაქტობრივი გენოციდი გრენლანდიის აბორიგენი მოსახლეობისა [...] ჩვენ გვაინტერესებს ერთი რამ — ჩანდეს ის ფარისევლობა, რომელსაც აქვს მსოფლიო პოლიტიკაში ადგილი. როდესაც საკუთარ თვალში ვერ ხედავენ დირეს და ჩვენ თვალში ეძებენ ბეწვს", — განაცხადა "ოცნების" პარლამენტის თავმჯდომარემ, შალვა პაპუაშვილმა ბრიფინგზე.

შეგახსენებთ, მანამდე საპარლამენტო უმრავლესობის ლიდერმა, ირაკლი კირცხალიამ გააკრიტიკა ევროპის ქვეყნების, მათ შორის შევდეთის მიერ საქართველოში მოსკოვის მექანიზმის ამოქმედების მხარდაჭერა და განაცხადა, რომ საქართველო "შეშფოთებულია შვედეთში გაზრდილი კრიმინალის დონით და ეკონომიკური სტაგნაციით" და მოუწოდა შვედეთს "დრო არ დახარჯოს საქართველოში არ არსებულ პრობლემებზე" და თავიანთ "მძიმე გამოწვევებს" მიხედოს.

• ეს პარლამენტარი საკუთარი ხალხის დაცვას ტყუილისა და შვედეთის შეურაცხყოფას ამჯობინებს — შვედი დეპუტატი ირაკლი კირცხალიას